„უცხოელი კლიენტები ძალიან მოაკლდნენ ბაზარს - ბინებზე წელს ფასების მკვეთ ზრდას არ უნდა ველოდოთ“ - ილია ინაშვილი
„2024 წელი ტურბულენტური იყო და ამას კარგი არაფერი მოუტანია უძრავი ქონების ბაზრისთვის“, - ამის შესახებ „ბიზნესპრესნიუსს“ Brokeri.ge-ის დამფუძნებელმა ილია ინაშვილმა განუცხადა.
მისი თქმით, გასულ წელს როგორც პირველად, ასევე მეორად ბაზრებზე საცხოვრებელ ბინებზე მოთხოვნა, წინა წლებთან შედარებით, შემცირებული იყო.
„2024 წელი ქართული უძრავი ქონების ბაზრისთვის არ იყო კარგი წელი. ქვეყანაში მიმდინარე მოვლენებმა გავლენა მოახდინა უძრავ ქონებასა და ტურიზმზე. საკმაოდ ტურბულენტური იყო გარემო და კარგი არაფერი მოუტანა უძრავი ქონების ბაზრისთვის. საცხოვრებელი უძრავი ქონების მეორად ბაზარზე მოთხოვნა იყო ძალიან დაბალი, მაგრამ როგორც კვლევები ვნახეთ, არც პირველად უძრავ ქონებაზე იყო მთელი წლის განმავლობაში მოთხოვნა, განსაკუთრებით კი მეორე ნახევარში“, - დასძინა რესპონდენტმა.
ინაშვილმა ისაუბრა მოლოდინებზეც და აღნიშნა, რომ 2025 წელს ბინებზე ფასების მკვეთრ ზრდას არ ელოდება, იქიდან გამომდინარე, რომ ამის წინაპირობა არ არსებობს.
გაიაფდება თუ არა უძრავი ქონება?
„ვფიქრობ, რომ საცხოვრებელი ბინების ფასების კუთხით ბაზარი სტაბილურია და ამაში ცუდს ვერაფერს ვხედავ. ვთვლი, რომ საცხოვრებელ უძრავ ქონებაზე 2025 წელს ფასების მკვეთ ზრდას არ უნდა ველოდოთ. ჩემი აზრით, მინიმალური ზრდა გვექნება 2025 წლის ბოლოდან, მაგრამ არ იქნება შესამჩნევი იმიტომ, რომ ვერანაირ წინაპირობას ვერ ვხედავ მკვეთრი ზრდის როგორიც ეს იყო 2022-2023 წლებში. ამ ეტაპზე ამის არგუმენტები არ არსებობს, მაგრამ შესაძლოა, ისეთი რამ მოხდეს, რამაც მკვეთრი ზრდა გამოიწვიოს, თუმცა, დღეს ამის წინაპირობა არ ჩანს. საცხოვრებელ ბინებზე ფასის კლებას გამოვრიცხავ, კლება გამორიცხულია როგორც პირველად ისე მეორად ბაზრებზე“, - ამბობს ინაშვილი.
მისი თქმით, ქართული უძრავი ქონების ბაზარზე საცხოვრებელი ტიპის ქონებაზე უცხოელი მყიდველების რაოდენობა შემცირებულია.
„სადღა არიან უცხოელი მყიდველები? დღეს ადგილობრივები ყიდულობენ ძირითადად უძრავ ქონებას, უცხოელი კლიენტები ძალიან მოაკლდნენ ჩვენი უძრავი ქონების ბაზარს“, - აცხადებს Brokeri.ge-ის დამფუძნებელი.
ცნობისთვის, „ქოლიერსის“ უძრავი ქონების ბაზრის კვლევის მიხედვით, 2024 წელს თბილისში 41 284 საცხოვრებელი ბინა გაიყიდა. გაყიდული ბინების უდიდესი ნაწილი, კერძოდ, 30 586 საცხოვრისი ახალ პროექტებში იყო, 10 698 კი ძველ პროექტებში. აღსანიშნავია ისიც, რომ 2024 წელს წლიურად 8.5%-ით გაიზარდა ახალ პროექტებში ტრანზაქციები, ძველ პროექტებში კი 13%-ით შემცირდა.
