2024 წელს მსოფლიოში 92.5 მლნ ავტომობილი დამზადდა - რომელია ლიდერი ქვეყანა

ავტომობილების მსოფლიო წარმოებამ 2024 წელს 92.5 მლნ ერთეული შეადგინა, რაც, 2023 წელთან შედარებით, 1%-ით ნაკლებია.

ამის შესახებ ავტომწარმოებელთა მსოფლიო ორგანიზაციის მონაცემებში წერია.

ამ რაოდენობაში ყველაზე დიდი წილი მსუბუქ ავტომობილებს უკავია, რომლის წარმოებამაც 67.7 მლნ ერთეული შეადგინა. ეს, 2023 წელთან შედარებით, 1%-ით ნაკლებია.

ასევე, 2024 წელს მსუბუქი კომერციული ავტომობილების 20.9 მლნ ერთეული (-3%), დიდი სატვირთო მანქანების 3.6 მლნ ერთეული (-2%) და 291 ათასი ერთეული ავტობუსი (+17%) აწარმოვეს.

ჩინეთი მსოფლიოს უმსხვილეს ავტომწარმოებლად რჩება, სადაც წელიწადში, დაახლოებით, 31.3 მლნ ერთეულის ავტოტრანსპორტი დამზადდა, რაც 2023 წელთან შედარებით 4%-ით მეტია.

მეორე ადგილზე 10.5 მლნ ერთეულით აშშ-ია, სადაც 2023 წელთან შედარებით, 1%-ით ნაკლები ავტომობილი გამოუშვეს.

მესამეზე 8.2 მლნ ერთეულით იაპონიაა, რაც 2023 წელზე 9%-ით ნაკლებია.

ხუთეულში, ასევე, 6 მლნ ერთეულით (+3%) ინდოეთი და 4.2 მლნ ერთეულით (+5%) მექსიკა მოხვდნენ.

მოამზადა ლადო სულაბერიძემ