Windows 11-ში ხარვეზის ლურჯ ეკრანს მწვანე ჩაანაცვლებს

Microsoft გეგმავს, Windows 11-ის ოპერაციული სისტემიდან ე.წ. სიკვდილის ლურჯი ეკრანი ამოიღოს და ის მწვანე ეკრანით ჩაანაცვლოს.

ამის შესახებ Windows Insider Blog წერს.

“სიკვდილის ლურჯი ეკრანი” (Blue Screen of Death-BSoD) Windows-ში კრიტიკული სისტემური შეცდომაა, რომელიც კომპიუტერის ავარიულად გათიშვას იწვევს. BSoD ჩნდება მაშინ, როცა ოპერაციული სისტემა აწყდება შეცდომას, რომლის გამოსწორებაც გადატვირთვის გარეშე შეუძლებელია. ეს შესაძლოა, გამოწვეული იყოს დრაივერის ხარვეზით, მოწყობილობის პრობლემებით, პროგრამული უზრუნველყოფის კონფლიქტით, სისტემის გადატვირთვით ან განახლების შეცდომებით.

კომპანია აღნიშნავს, რომ ახალი ინტერფეისი, რომელიც ამჟამად მხოლოდ ტესტირების რეჟიმშია, Windows 11-ის დიზაინის პრინციპებს უკეთ შეესაბამება და სამუშაოსთან მომხმარებლის სწრაფ დაბრუნებას უზრუნველყოფს.

„ჩვენ გავამარტივეთ ეს ეკრანი ტექნიკური ინფორმაციის შენარჩუნებით,” - აცხადებენ კომპანიაში.

ფერის შეცვლის გარდა, ხარვეზის ეკრანიდან ნაცნობი QR-კოდი და სევდიანი „სმაილი“ გაქრება. კომპანიას სურს, “სიკვდილის ეკრანი” ნაკლებად საშინელი გახადოს, განსაკუთრებით, ახალი მომხმარებლებისთვის, რომლებიც შესაძლოა, ამჟამინდელმა BSoD-მა მეტად შეაშინოს.

ამჟამად ახალი ფუნქცია 24H2-ის ვერსიის, ასევე, უფრო ახალ, Beta-ს, Dev-ისა და Canary-ის არხების Windows 11-ში მხოლოდ Windows Insider-ებისთვის არის ხელმისაწვდომი.

მოამზადა ლადო სულაბერიძემ