იაპონია 2026 წელს კრიპტოვალუტებს ფინანსურ აქტივებად აღიარებს
იაპონიის ფინანსური სერვისების სააგენტო კრიპტოაქტივებისთვის ლეგალური სტატუსის მინიჭებას გეგმავს, რა მიზნითაც ბირჟებისა და ფინანსური ინსტრუმენტების შესახებ აქტს გადახედავს.
ინფორმაციას Nikkea Asia ავრცელებს.
კერძოდ, კრიპტოვალუტაზე, როგორც ფინანსურ პროდუქტზე ინსაიდერული სავაჭრო შეზღუდვები გავრცელდება, რომლებიც გაურკვეველი არასაჯარო ინფორმაციის საფუძველზე ყიდვა-გაყიდვას კრძალავს.
ფინანსური ინსტრუმენტებისა და ბირჟების შესახებ კანონში ცვლილებების პროექტს სააგენტო პარლამენტს 2026 წლის დასაწყისში წარუდგენს.
ამჟამად ეს ცვლილებები ექსპერტთა დახურულ ჯგუფებში განიხილება.
Nikkea Asia წერს, რომ “ამჟამად იაპონიაში ბიტკოინი და სხვა კრიპტოვალუტები კლასიფიცირებულია, როგორც ანგარიშსწორების საშუალება, რადგან ისინი თავიდანვე გადახდის საშუალებად განიხილებოდა. თუმცა თუ კრიპტოვალუტები ფინანსურ პროდუქტად იქნება აღიარებული, კრიპტოაქტივები, სავარაუდოდ, ცალკე იურიდიულ სტატუსს მიიღებენ, როგორიც აქციები და ობლიგაციებია.”
ამასთან, კრიპტოვალუტების ფინანსურ აქტივებად კლასიფიკაციის შემთხვევაში არამხოლოდ ბირჟებს, არამედ კომპანიებსაც, რომლებიც კრიპტოვალუტაში ინვესტიციებს მიიზიდავენ, ფინანსურ ორგანოებში დარეგისტრირება მოუწევთ.
გამოცემის თანახმად, კრიპტოვალუტებით ინსაიდერულ ვაჭრობაზე შეზღუდვები ტრადიციული ფინანსური პროდუქტების წესების მსგავსი იქნება.
თუ ცვლილებები ძალაში შევა, მარეგულირებელი კრიპტოსერვისის ადგილობრივ პროვაიდერებზე თაღლითობის შემთხვევების ზრდის გამო კონტროლს გაამკაცრებს.
ცნობისთვის: თებერვალში, Nikkei წერდა, რომ იაპონიის ფინანსური სერვისების სააგენტო ფასიანი ქაღალდების თანაბარ ფინანსურ პროდუქტად კრიპტოაქტივების აღიარების საკითხს განიხილავდა.
მოამზადა ლადო სულაბერიძემ