რუსული რესურსების შემსყიდველ ქვეყნებს შესაძლოა, 500%-იანი ტარიფები დაუწესდეთ - სენატის ახალი კანონპროექტი
ქვეყნებს, რომლებიც რუსულ ნავთობს, გაზს, ურანს და სხვა რესურსებს ყიდულობენ, აშშ 500%-იან ტარიფებს დაუწესებს. შესაბამისი კანონპროექტი აშშ-ის სენატმა უკრაინასთან სამშვიდობო შეთანხმების ხელმოწერაზე კრემლის უარის გამო მოამზადა.
ინფორმაციას The Washington Times ავრცელებს.
კანონპროექტი რესპუბლიკელმა სენატორმა, ლინდსი გრემმა და დემოკრატმა სენატორმა, რიჩარდ ბლუმენტალმა წარადგინეს, ხოლო თანაავტორი როგორც რესპუბლიკელი, ასევე, დემოკრატი 50 სენატორია.
რუსული რესურსების შემსყიდველ ქვეყნებზე ტარიფების დაწესების გარდა, ინიციატივა სანქციებს იმ პირების მიმართ ითვალისწინებს, რომლებიც რუსეთის აგრესიას მხარს უჭერენ.
შეზღუდვები იმ შემთხვევაში ამოქმედდება, თუ სამშვიდობო მოლაპარაკებები ჩაიშლება ან მიღწეულ შეთანხმებას რუსეთი დაარღვევს.
სენატორების ერთობლივ განცხადებაში წერია, რომ „რუსეთის წინააღმდეგ ეს სანქციები მზად არის და ორპარტიულ და ორპალატიან უპირატეს მხარდაჭერას მიიღებს, თუ სენატსა და წარმომადგენელთა პალატაში კენჭისყრისთვის შევა.”
სენატორები იმედოვნებენ, რომ პრეზიდენტ დონალდ ტრამპი და მისი გუნდი წელს ომს დაასრულებს და „თავისუფალი და დემოკრატიული უკრაინის შენარჩუნებას უზრუნველყოფს. “
მოამზადა ლადო სულაბერიძემ