პუტინმა აფხაზებისთვის რუსული მართვის მოწმობების აღება გაამარტივა
პუტინმა ხელი მოაწერა განკარგულებას აფხაზეთის ე.წ. მოქალაქეებისთვის რუსული მართვის მოწმობის გაცემის პროცედურის გამარტივების შესახებ.
ინფორმაციას რუსული „კომერსანტი“ ავრცელებს.
ახალი წესი ეხება მათ, ვისაც ბინადრობის ნებართვა ან რუსული პასპორტი აქვს. ბრძანება 2026 წლის 1-ელ აპრილამდე იქნება ძალაში.
კერძოდ, თუ აფხაზეთის ე.წ. მოქალაქეები დე ფაქტო მოქმედ აფხაზურ მართვის მოწმობას ფლობენ, რუსული მოწმობის აღებას გამოცდისა და სამედიცინო შემოწმების გარეშე შეძლებენ. ამასთან, რუსული მართვის მოწმობის აღება აფხაზეთის ტერიტორიაზეც იქნება შესაძლებელი.
განკარგულების მიხედვით, რუსეთის მთავრობამ აფხაზეთის ე.წ. მოქალაქეები რუსული მართვის მოწმობის გაცემისათვის სახელმწიფო გადასახადისგან უნდა გაათავისუფლოს.
ბრძანებულება ძალაში უკვე შევიდა.
ზოგადად, ამ დღიდან უცხოელები, რომლებმაც რუსეთში 2024 წლის 1 აპრილამდე მიიღეს ბინადრობის ნებართვა ან რუსეთის მოქალაქეობა, ქვეყანაში უცხოური მართვის მოწმობებით ვერ ისარგებლებენ. ვისაც მართვის მოწმობა რუსულით არ შეუცვლია, 5-15 ათასი რუბლით დაჯარიმდება. რუსული მართვის მოწმობის აღების ვალდებულება, ასევე, უცხოური მოწმობის მქონე რუსებზე ვრცელდება, რომლებიც რუსეთში 2024 წლის 1 აპრილამდე დაბრუნდნენ.
ცნობისთვის: რუსები სულ უფრო ხშირად ჩამოდიან საქართველოში მართვის მოწმობის ასაღებად, რომ თავიანთ ქვეყანაში დაბრუნების შემდეგ რუსულით ჩაანაცვლონ, რადგან ქართული მოწმობის აღება, რუსულთან შედარებით, უფრო მარტივი და იაფია. 2024 წლის 1-ლი აპრილიდან კანონი როგორც რუსებს, ასევე, სხვა ქვეყნის მოქალაქეებს საშუალებას აძლევს, უცხოური მართვის მოწმობები რუსულით შეცვალონ. საქართველოს შსს-ის მონაცემებით, 2024 წელს საქართველოში მართვის მოწმობა რუსეთის ფედერაციის 128 მოქალაქემ, 2023 წელს კი 99-მა მოქალაქემ აიღო.
მოამზადა ლადო სულაბერიძემ