რუსული Red Wings ბათუმში მოსკოვის გარდა უფადანაც იფრენს
რუსული ავიაკომპანია, Red Wings 24 აპრილიდან უფადან ბათუმის მიმართულებით პირდაპირ რეისებს განაახლებს. ბათუმში Red Wings ჯერჯერობით მხოლოდ მოსკოვიდან დაფრინავს.
ინფორმაციას უფას საერთაშორისო აეროპორტის პრესსამსახური ავრცელებს.
ფრენებს კვირაში ორჯერ, ყოველ ხუთშაბათსა და კვირას 100-მდე მგზავრის ტევადობის Sukhoi Superjet 100-ის თვითმფრინავი შეასრულებს.
უფადან თვითმფრინავი 23:50 საათზე აფრინდება, ბათუმიდან კი ადგილობრივი დროით 03:50 საათზე გაემგზავრება. მგზავრობის დრო, დაახლოებით, სამსაათნახევარია.
ბილეთის ფასი სერვისის მიხედვით 16.895-იდან 28.180 რუბლამდე (200-დან 334 დოლარამდე) ვარირებს.
ამასთან, უფას აეროპორტის პრესსამსახური მგზავრებს შეახსენებს, რომ ქალაქიდან თბილისის მიმართულებით პირდაპირ რეისებს ყოველ სამშაბათსა და პარასკევს ავიაკომპანია, Azimuth ასრულებს. ბილეთის მინიმალური ფასი 140 დოლარია.
თებერვალში ცნობილი გახდა, რომ Red Wings-ი საქართველოს, კერძოდ, ბათუმისა და თბილისის მიმართულებას კიდევ ერთ რუსულ ქალაქს, ნიჟნი ნოვგოროდს ამატებს. კერძოდ, 26 აპრილიდან ნიჟნი ნოვგოროდი-ბათუმის რეისები ყოველ შაბათს, მოსკოვის დროით 22:30 საათზე, ხოლო უკანა მიმართულებით კვირას, თბილისის დროით 03:50 საათზე არის დაგეგმილი. ამასთან, 28 მაისიდან მათ კიდევ ერთი რეისი დაემატება, რომელიც ყოველ ოთხშაბათს ბათუმის, ხუთშაბათს კი ნიჟნი ნოვგოროდის მიმართულებით შესრულდება. ბილეთის ფასი 19.345 რუბლიდან (229 დოლარიდან) იწყება.
ნიჟნი ნოვგოროდიდან თბილისის მიმართულებით Red Wings ფრენებს 28 აპრილიდან დაიწყებს. რეისები ყოველ ორშაბათს, 22:45 საათზე, ხოლო უკანა მიმართულებით სამშაბათს, ადგილობრივი დროით 04:05 საათზე არის დაგეგმილი. ასევე, 5 ივნისიდან ნიჟნი ნოვგოროდ-თბილისის მიმართულებას კიდევ ერთი რეისი დაემატება, რომელიც ყოველ პარასკევს შესრულდება. ბილეთის ღირებულება კაცზე 29,685 რუბლი, ანუ 352 დოლარია.
ცნობისთვის: Red Wings თბილისის მიმართულებით ფრენებს ეკატერინბურგიდან, სანქტ-პეტერბურგიდან, სოჭიდან, ჩელიაბინსკიდან, სამარიდან და ყაზანიდან ახორციელებს. რაც შეეხება ქუთაისის აეროპორტის მიმართულებას, ავიაკომპანია თავდაპირველად მხოლოდ მოსკოვიდან დაფრინავდა, ხოლო 2024 წლის დეკემბრიდან სანქტ-პეტერბურგი, ეკატერინბურგი და ყაზანი დაემატა.
მოამზადა ლადო სულაბერიძემ