ერთ წელიწადში ტრამპის ქონება გაორმაგდა - Forbes
აშშ-ის პრეზიდენტ დონალდ ტრამპის სავარაუდო ქონება გაორმაგდა და 2024 წლის 2,3 მლრდ დოლარიდან წელს 5,1 მლრდ დოლარამდე გაიზარდა, რაც მან კრიპტოვალუტაში წარმატებული ინვესტიციის დახმარებით მოახერხა.
ამის შესახებ ამერიკული ჟურნალ Forbes-ის მსოფლიოს უმდიდრესი ადამიანების 39-ე რეიტინგში წერია.
“ცოტას თუ ჰქონდა მილიარდერებიდან ტრამპზე უკეთესი წელი და არა მხოლოდ იმიტომ, რომ ის კვლავ აშშ-ის პრეზიდენტი გახდა, არამედ თეთრ სახლში დაბრუნებამდე მან თავის ყულაბას კრიპტოვალუტაში მეტად მომგებიანი ინვესტიცია შეჰმატა,“ - წერს Forbes.
ტრამპის ქონების უმეტესი ნაწილი კომპანია Trump Media and Technology Group-ისგან შედგება, რაც, Forbes-ის შეფასებით, 2,3 მლრდ დოლარს შეადგენს. ასევე, მნიშვნელოვანი, ანუ 1,1 მლრდ დოლარის ოდეონობის წილი უძრავ ქონებაში ინვესტიციებს უკავია. გოლფის კლუბებისა და კურორტების წილი 1,1 მლრდ დოლარია, ხოლო ლიკვიდურ აქტივებზე 770 მლნ დოლარი მოდის.
Forbes-მა, ასევე, დონალდ ტრამპის სხვა, 120 მლნ დოლარის აქტივები დათვალა, რომლებიც მის 1991 წლის Boeing 757-200-ის თვითმფრინავ Trump Force One-სსა და პენსიებს, მეღვინეობას, ლიცენზირებისა და მართვის ბიზნესს, ასევე, კრედიტებს მოიცავს, რომლებიც ტრამპმა შვილებზე სახლების შესაძენად გასცა.
ტრამპს სამართლებრივი პასუხისმგებლობაც აქვს დაკისრებული და მიმდინარე წლის მარტის მდგომარეობით, მან სასამართლო გადაწყვეტილებების საფუძველზე, დაახლოებით, 590 მლნ დოლარი უნდა გადაიხადოს.
ცნობისთვის: Forbes-ის სიაში 3000-ზე მეტი ადამიანი მოხვდა, რომელთა საერთო ქონება რეკორდულ 16,1 ტრლნ დოლარს შეადგენს. ამასთან, პირველად მოხდა, როცა 200 მლრდ დოლარზე მეტ ქონებას სამი ადამიანი ფლობს.
2025 წლის რეიტინგში პირველ ადგილს Tesla-სა და SpaceX-ის დამფუძნებელი, ილონ მასკი დაუბრუნდა, ხოლო LVMH-ის აღმასრულებელი დირექტორი, ბერნარ არნო, რომელიც გასულ წელს სიის სათავეში იყო, მეხუთე ადგილამდე ჩამოქვეითდა. Meta-ს დამფუძნებელი, მარკ ცუკერბერგი წამყვან სამეულს დაუბრუნდა.
მოამზადა ლადო სულაბერიძემ