საქართველოს ხელოვანები იმპორტიორებს ღია წერილით მიმართავენ

საქართველოს ხელოვანები იმპორტიორებს ღია წერილით მიმართავენ. როგორც წერილშია აღნიშნული, ისინი იმპორტიორებს სთხოვენ გაგებით მოეკიდონ ახალ რეგულაციებს, რომელიც სფეროს განვითარებასა და ხელოვანთა კეთილდღეობას ხელს უწყობს.

„ჩვენ, საქართველოს ხელოვანები, მივმართავთ ბიზნეს იმპორტიორებს, ბიზნეს სექტორსა და ყველას, ვინც დაინტერესებულია საავტორო უფლებების სფეროში მიმდინარე მოვლენებით და იმ ცვლილებებით, რაც აღნიშნული სფეროს განვითარებისათვის ხორციელდება.

წლების განმავლობაში, ჩვენ ვებრძოდით ამ სფეროში არსებულ უდიდეს უსამართლობას და ვერ ვიღებდით კუთვნილ ჰონორარებს, რაც ჩვენი ინტელექტუალური საკუთრების კუთხით გვეკუთვნოდა.

ბოლო ერთი წლის განმავლობაში განხორციელებული ცვლილებების ფონზე, მას შემდეგ, რაც საქართველოს ხელოვანები IPOA-ს პლატფორმაზე გავერთიანდით, ჩვენ ვიგრძენით, რომ თურმე ჩვენი შემოქმედება ამ ქვეყანაში ფასდება.

შეგახსენებთ ყველას, რომ სწორედ კულტურაა ის სფერო, რითაც მუდმივად ამაყობდა ჩვენი ქვეყანა და რითაც სახელი გაითქვა საქართველომ მთელ მსოფლიოში. კულტურა, რომლის წარმომადგენლებიც ვართ ჩვენ და რომელსაც სჭირდება როგორც დაფასება, ისე განვითარება. შესაბამისად, უდიდესი მნიშვნელობა ენიჭება ყველა იმ ცვლილებას, რაც საავტორო სფეროში განხორციელდა.

ცალკე აღნიშვნის ღირსია საქართველოს პარლამენტის კულტურის კომიტეტის მიერ კანონში განხორციელებული ცვლილებები, რითაც ინტელექტუალური საკუთრების სფეროს განვითარების ახალი ეტაპი დაიწყო და იგი გაუთანაბრდა იმ ევროპულ სტანდარტებს, რაც თითოეული ჩვენგანისთვის მნიშვნელოვანი და ესოდენ ღირებულია.

გარდა ამისა, კიდევ ერთხელ მადლობას ვუხდით საქპატენტს გაწეული შრომისთვის და იმისთვის, რომ ამ მნიშვნელოვან ეტაპზე ითვალისწინებს ხელოვანთა ინტერესებს და აქტიურ ნაბიჯებს დგამს სფეროში პოლიტიკის განსაზღვრისა და საუკეთესო პრაქტიკის დანერგვის მიზნით.

დაარსებიდანვე IPOA ცდილობს დანერგოს ყველა ის მაღალი სტანდარტი, რითაც საქართველო გაუტოლდება ევროპულ ქვეყნებს და აკრედიტაციის მიღებიდან სულ რაღაც ერთ წელიწადში ჩვენმა ასოციაციამ შეძლო, რომ ხელოვანების არსებული ჰონორარები მნიშვნელოვნად გაზრდილიყო და დაახლოებოდა იმ ოდენობას, რაც ჩვენ ღირსეული მოღვაწეობის საშუალებას მოგვცემდა. ამაში კერძო კოპირების მიმართულებით ქმედითი ღონისძიებების განხორციელებამაც თავისი წვლილი შეიტანა.

შეგახსენებთ, რომ ე.წ. „კერძო კოპირების“ კომპენსაციის გადახდის პრაქტიკა მსოფლიოს უმრავლეს ქვეყანაში წარმატებით არსებობს და მოწყობილობათა იმპორტიორებსა და მწარმოებლებს ავალდებულებს უფლებამფლობელებისთვის ჰონორარის გადახდას. აღნიშნული ჰონორარების შეგროვებას კი ყველგან, ისევე როგორც ჩვენს ქვეყანაში, უფლებათა კოლექტიური საფუძვლით მმართველი ასოციაციები ახორციელებენ.

გვესმის და გაგებით ვეკიდებით იმ საკითხს, რომ ნებისმიერი დამატებითი ხარჯი შესაძლოა მტკივნეული იყოს, თუმცა, აქვე გვსურს, ჩვენი ერთობლივი პოზიცია დავაფიქსიროთ და მივმართოთ როგორც იმპორტიორებს, ისე საქპატენტს და ყველა დაინტერესებულ პირს თუ ორგანოს, რომ გაითვალისწინოს IPOA-ს, როგორც ჩვენი საერთო ნების გამომხატველი ორგანიზაციის პოზიცია.

იმპორტიორების მიერ „კერძო კოპირების“ ჰონორარის გადახდა სწორედ ის მოდელია, რომელიც მსოფლიოს წამყვანი ქვეყნების საუკეთესო გამოცდილებაზე დაყრდნობით გათვალისწინებულია საქართველოს კანონმდებლობით და რომლის აღსრულებასაც უზრუნველყოფს IPOA.

აქვე, ძალიან მნიშვნელოვანია იმის აღნიშვნა, რომ გადასახდელი ჰონორარის დადგენილი ტარიფი სრულად შეესაბამება ევროპულ სტანდარტებს, ჩვენი ქვეყნის სოციალურ დონესა და ბიზნეს იმპორტიორების გადამხდელუნარიანობას.

ყოველივე აღნიშნულიდან გამომდინარე, დიდი პატივისცემით მივმართავთ იმპორტიორებს, რომ გაგებით მოეკიდონ ახალ რეგულაციებს, რომლებიც ხელს უწყობს სფეროს განვითარებასა და ხელოვანთა კეთილდღეობას.

დარწმუნებულები ვართ, რომ გამოიძებნება საერთო ენა, სადაც გათვალისწინებული იქნება ჩვენი, ხელოვანი ხალხის, ინტერესები, რის გამოც განხორციელდა ამდენი ცვლილება „საავტორო და მომიჯნავე უფლებების შესახებ“ კანონში, რისთვისაც შევქმენით ეს ასოციაცია და რისთვისაც მივიღეთ აკრედიტაცია საქპატენტისგან.

20 წლის განმავლობაში სფერო, რომელიც კვდებოდა, როგორც იქნა დადგა ფეხზე და ჩვენი ერთობლივი ძალისხმევით ვეღარავინ შეძლებს ჩვენი უფლებების შელახვასა და ინტელექტუალური საკუთრების მითვისებას.

კიდევ ერთხელ ღიად და საჯაროდ გვსურს განვაცხადოთ, რომ IPOA (ინტელექტუალური საკუთრების მფლობელთა ასოციაცია) ჩვენ, საქართველოს ხელოვანებმა, შევქმენით საკუთარი ინტერესების დასაცავად.

შესაბამისად, ყველა ცვლილება, რაც სფეროში კანონის სრული გათვალისწინებით ხორციელდება, არის ჩვენთან შეთანხმებული. IPOA-ს თითოეულ ნაბიჯს ვიზიარებთ საქართველოს ხელოვანები და მოგიწოდებთ ყველა მხარეს, გაგებით მოეკიდოთ იმ ცვლილებებს, რაც მიზნად ისახავს სფეროს განვითარებასა და ორიენტირებულია ავტორ-შემსრულებელთა უფლებების დაცვასა და ცხოვრების დონის გაუმჯობესებაზე“, - ნათქვამია მიმართვაში.