შავ ზღვაში ჩაძირული ტანკერებიდან საწვავი ისევ ჟონავს
სატელიტურმა სურათებმა ქერჩის სრუტეში ჩაძირული ტანკერებიდან, სავარაუდოდ, საწვავის ახალი გაჟონვა დააფიქსირა. ამის შესახებ რუსმა ეკოლოგმა, გეორგი კავანოსიანმა საკუთარ Telegram-არხზე დაწერა.
მან 31 მარტს გადაღებული სრუტის რადიოლოკაციური ფოტოსურათი გამოაქვეყნა, რომელზეც Volgoneft-ის ჩაძირული ტანკერების ფრაგმენტები ჩანს. სპეციალისტის თქმით, გამოსახულებები შესაძლოა, იმაზე მიუთითებდეს, რომ ერთ-ერთი ტანკერის, Volgoneft-239-ის წინა ნაწილიდან ნავთობპროდუქტების გაჟონვა გრძელდება.
შავ ზღვაში მაზუთის ახალი ჩაღვრის ფაქტი პროფილურ სამსახურებს ჯერ არ დაუდასტურებიათ. კრასნოდარის მხარის ოპერატიული შტაბის 2 აპრილის ოფიციალურ განცხადებაში წერია, რომ ანაპის მუნიციპალურ სამსახურებს სანაპიროზე მაზუთის ახალი ემისიები არ დაუფიქსირებიათ და ბოლო ემისია ანაპის რაიონში 1 აპრილს დაფიქსირდა.
რუსეთის კოსმოსურ-ტექნოლოგიური კომპანია SR Data-ს ექსპერტები სატელიტური სურათების საფუძველზე ვარაუდობენ, რომ აპრილის ბოლოს მაზუთის ლაქა 2.175 კვადრატულ კილომეტრ ფართობზე გადაიჭიმება. მათი შეფასებით, ლაქა უახლოეს კვირებში მცირე ფრაგმენტებად დაშლას დაიწყებს, რაც დაბინძურების ზონას გაზრდის. კერძოდ, ახალი ემისიები ანაპის სანაპიროზე, ხოლო შტორმის შემთხვევაში ტუაფსეში, სოჭსა და სევასტოპოლში გაჩნდება.
ამჟამად ნავთობპროდუქტების მნიშვნელოვანი ნაწილი დაბალი ტემპერატურის გამო ფსკერზე არის დალექილი, თუმცა თბილი ამინდების დაწყებისთანავე ზედაპირზე ამოტივტივდება. შედეგად, SR Data-ს პროგნოზით, ანექსირებული ყირიმის სანაპირო ზოლის 115 კილომეტრი და კრასნოდარის მხარის სანაპიროს 85 კილომეტრი რისკის ქვეშ დადგება.
ცნობისთვის: ტანკერები, Volgoneft-239 და Volgoneft-212, რომლებსაც 9,2 ათასი ტონა მაზუთი გადაჰქონდათ, ქერჩის სრუტეში, კავკაზის პორტის სიახლოვეს 15 დეკემბერს ჩაიძირა. შედეგად შავ ზღვაში 4 ათას ტონაზე მეტი ნავთობპროდუქტი ჩაიღვარა. ჩაძირული ტანკერებიდან ნავთობპროდუქტები თვეზე მეტი ხნის განმავლობაში ჟონავდა და მისი ამოტუმბვის სამუშაოები მხოლოდ 19 იანვარს დაიწყო. რუსეთის ბუნებრივი რესურსების სამინისტროს შეფასებით, კრასნოდარის მხარის პლაჟები მაზუთისგან მხოლოდ 2026 წლის მაისისთვის გაიწმინდება. თუმცა რაიონში ეკოლოგიის გაუმჯობესებას შესაძლოა, 10-15 წელი დასჭირდეს. ფედერაციის ტრანსპორტის სამინისტროს ცნობით, წყლიდან ჩაძირულ ტანკერებს მხოლოდ 2026 წლისთვის ამოიღებენ.
მოამზადა ლადო სულაბერიძემ