"ფოთის თავისუფალ ინდუსტრიულ ზონაში 600 მლნ დოლარის ინვესტიციის განხორციელებაზე მოლაპარაკებები მიმდინარეობს"

ფოთის თავისუფალ ინდუსტრიულ ზონაში 600 მილიონი დოლარის ინვესტიციის განხორციელებაზე პოტენციურ ინვესტორთან მოლაპარაკებები მიმდინარეობს , - ამის შესახებ პირველმა ვიცე-პრემიერმა, ეკონომიკისა და მდგრადი განვითარების მინისტრმა დიმიტრი ქუმსიშვილმა იმ კითხვის საპასუხოდ განაცხადა, რომლის თანახმადაც, ფოთის თავისუფალი ინდუსტრიული ზონის მმართველი არაბული კომპანია ,,რაკია ჯორჯიას” ნაცვლად სახელმწიფო ხდება.

როგორც დიმიტრი ქუმსიშვილმა აღნიშნა, ,,რას ალ ხაიმასთან” (”რაკია ჯორჯიას” მფლობელი კომპანია) საუკეთესო ურთიერთობები არსებობს.

,,ეს არის ჯგუფი, რომელიც დღესდღეისობით არის საქართველოში ძალიან მნიშვნელოვანი აქტივების მფლობელი, მაგალითად, სასტუმრო “შერატონი”, სადაც ძალიან აქტიურად მიმდინარეობს ინვესტიციები - 30 მილიონი დოლარი იდება და ჩვენ გვექნება განახლებული “შერატონი” წლის ბოლოსთვის. ეს არის ისეთი აქტივი, როგორიცაა “ თბილისი მოლი”, სადაც ასევე ”რას ალ ხაიმას” საინვესტიციო ხელისუფლება ფიქრობს შემდგომში გაფართოებას და ინვესტიციების განხორციელებას. გარდა ამისა, არსებობს რამდენიმე მნიშვნელოვანი აქტივი, რომელიც კომპანიას გააჩნია”, - განაცხადა ქუმსიშვილმა.

მისივე თქმით, თავის დროზე ”რას ალ ხაიმას” საინვესტიციო ხელისუფლება იყო ასევე ფოთის პორტის მფლობელი, რომელიც მათ შემდგომ გაყიდეს.

,,თითონ თავისუფალი ინდუსტრიული ზონა და ფოთის აეროპორტი, რომელიც ერთი შემადგენელი ნაწილი იყო, კლასტერული ხედვა იყო, რომელიც გააჩნდა ”რას ალ ხაიმას” საინვესტიციო ხელისუფლებას, ხოლო მას შემდეგ, რაც ფოთის პორტი გაიყიდა, ინვესტიციები, რომლებიც უნდა განხორციელებულიყო ფოთის აეროპორტსა და ფოთის თავისუფალ ინდუსტრიულ ზონაში, უკვე აღარ განხორციელდა და როგორც მოგახსენეთ, ეს არის ლოგიკა. შეთანხმება, რომელსაც ჩვენ ფოთის თავისუფალი ინდუსტრიული ზონის მფლობელთან - ”რას ალ ხაიმას” საინვესტიციო ხელისუფლებასთან მივაღწიეთ, მდგომარეობს შემდეგში - ჩვენ ეს აქტივი სახელმწიფოში დავიბრუნეთ. არ მინდა ციფრებში შევცდე, მაგრამ ჩემი პირადი შეხედულებით, ეს აქტივი 100-დან 150 მილიონ ლარამდე უნდა ღირდეს, შესაბამისად, დავიბრუნეთ 300 ჰექტარზე მეტი თავისუფალი ინდუსტრიული ზონა და 150 ჰექტარი ფოთის აეროპორტი. დავიბრუნეთ სწორედ იმიტომ, რომ ერთიც და მეორეც გახდეს ჩვენი საინვესტიციო პოლიტიკის ინსტრუმენტი, სახელმწიფოს მიეცეს შესაძლებლობა აქტიურად გამოიყენოს ინდუსტრიული ზონა იმისთვის, რომ რაც შეიძლება ბევრი და დიდი ინვესტორები მოვიზიდოთ”, - განაცხადა ქუმსიშვილმა.

ვიცე პრემიერის თქმით, სახელმწიფო მუშაობს ამ წუთში ძალიან მსხვილ ინდუსტრიულ ჯგუფთან და მოლაპარაკების წარმატებით დასრულების შემთხვევაში, მის სახელს სავარაუდოდ, უახლოეს მომავალში დაასახელებს.

,,600 მილიონ დოლარიან ინვესტიციებზე იქნება საუბარი თავისუფალ ინდუსტრიულ ზონაში. აქედან გამომდინარე, მიზანი არის ის, რომ თავისუფალი ინდუსტრიული ზონა, ასევე ფოთის აეროდრომი იყოს გამოყენებული როგორც ჩვენი საინვესტიციო პოლიტიკის იმპლემენტაციის ინსტრუმენტი”, - განაცხადა ქუმსიშვილმა.