ბიტკოინში ინვესტირების გამო, ბრიტანეთში მოსახლეობას გარდაუვალი ფინანსური დანაკარგის შესახებ აფრთხილებენ
ბრიტანული გამოცემა Independent-ის ინფორმაციით, გაერთიანებული სამეფოს ფინანსური რეგულაციების სააგენტოს ხელმძღვანელმა, ენდრიუ ბეილმა, ტელეკომპანია BBC-ის ეთერში, საკუთარი ქვეყნის მოსახლეობა გააფრთხილა , მოემზადონ იმ ფინანსური დანაკარგისთვის, რომელსაც მიიღებენ ბიკტოინში ინვესტირების გამო.
ენდრიუ ბეილის განცხადებით, ამის მიზეზი გახლავთ სრულიად დაუსაბუთებელი და მხოლოდ მაღალი ინტერესით გამოწვეული ბიტკოინის ღირებულების ზრდა, რომელიც ბოლო თვეების განმავლობაში ფიქსირდება. ეს კი კონკრეტული რეგულაციებისა და საფუძვლის არქონის გამო აუცილებლად გასკდება საპნის ბუშტივით.
მისივე განცხადებით, ვირტუალური ვალუტის მიმართ შეიქმნა არაჯანსაღი დამოკიდებულება. ინვესტორებმა ბიტკოინის ღირებულების სწრაფად ზრდის ფონზე გადაწყვიტეს სწრაფად გამდიდრება, რამაც თავის მხრივ, კიდევ უფრო დააჩქარა მისი ფასის ელვისებური ზრდა, რაც აუცილებლად დროებითი მოვლენაა და უახლოეს მომავალში ჩვენ მის სანახაობრივ ვარდნას ვიხილავთ.
ბეილმა სრული სერიოზულობით გააფრთხილა ადამიანები, რომ ისინი აუცილებლად ნახავენ ფინანსურ დანაკარგს ბიტკოინში ფულის ჩადების გამო. არგუმენტად კი განაცხადა, რომ ამ ეტაპზე ძალიან ცოტა რამ არის ცნობილი, თუ როგორ ხდება მისი ფასის ფორმირება, ეს კი ზრდის ალბათობას, რომ მისი ხელოვნურად მანიპულირება ხდება.
კოკა კვირკველია