რა ღირს საქართველოს სასტუმროებში დასვენება

2018 წლის სექტემბერში, აპრილთან შედარებით, 3, 4 და 5 ვარსკვლავიანი სასტუმროების ფასების ინდექსი 6.4%-ით; საოჯახო ტიპის სასტუმროების ფასები კი 5.7%-ით შემცირდა.ამის შესახებ საერთაშორისო ორგანიზაცია PMCG-ის კვლევაშია ნათქვამი.

ამასთან, კვლევის თანახმად, 2018 წლის სექტემბერში, საქართველოში 3-ვარსკვლავიანი სასტუმროების საშუალო ფასმა 135 ლარი შეადგინა. აღსანიშნავია, რომ 3-ვარსკვლავიანი სასტუმროების ყველაზე მაღალი საშუალო ფასი - 153 ლარი თბილისში და 151 ლარი - სამცხე-ჯავახეთში დაფიქსირდა. ყველაზე დაბალი საშუალო ფასით კი გურია და ქვემო ქართლი გამოირჩეოდა, სადაც სექტემბერში შესაბამისად, ფასებმა 74 ლარი და 85 ლარი შეადგინა.

„4-ვარსკვლავიანი სასტუმროების საშუალო ფასმა სექტემბერში 244 ლარი შეადგინა. ყველაზე მაღალი საშუალო ფასი 4-ვარსკვლავიან სასტუმროთა შორის კახეთსა და სამცხე-ჯავახეთში დაფიქსირდა და შესაბამისად, 336 ლარი და 269 ლარი შეადგინა. ყველაზე დაბალი ფასები კი 4 ვარსკვლავიან სასტუმროებს შორის სექტემბერში იყო: სამეგრელო-ზემო სვანეთში - 153 ლარი და გურიაში - 180 ლარი.

5-ვარსკვლავიან სასტუმროთა საშუალო ფასმა კი, სექტემბერში 521 ლარი შეადგინა. თბილისში, ამ ტიპის სასტუმროებში, სტანდარტული 2-ადგილიანი ნომრის საშუალო ფასმა 619 ლარი შეადგინა, კახეთში - 400 ლარი, სამცხე-ჯავახეთში - 383 ლარი, ხოლო აჭარაში - 527 ლარი,“-აღნიშნულია კვლევაში.

რაც შეეხება საოჯახო ტიპის სასტუმროებს, მათი საშუალო ფასი სექტემბერში 70 ლარი იყო. კვლევის თანახმად, ყველაზე მაღალი ფასი საოჯახო ტიპის სასტუმროებში გურიასა (122 ლარი) და ქვემო ქართლში (104 ლარი); ყველაზე დაბალი ფასი კი - შიდა ქართლსა (56 ლარი) და იმერეთში (58 ლარი) დაფიქსირდა.