მამუკა ხაზარაძე და ბადრი ჯაფარიძე პარლამენტში მივიდნენ
„თიბისი ბანკის“ დამფუძნებლები, მამუკა ხაზარაძე და ბადრი ჯაფარიძე პარლამენტში მივიდნენ.
მათ დღეს საფინანსო-საბიუჯეტო კომიტეტის სხდომაზე მოუსმენენ, რომელიც რამდენიმე წუთში დაიწყება. ჯაფარიძე და ხაზარაძე მზადყოფნას გამოთქვამენ, დეპუტატების მიერ დასმულ ყველა შეკითხვას გასცენ პასუხი.
შეგახსენებთ, რომ “თიბისი ბანკის" საქმეზე მსჯელობა 26 თებერვალს, დარგობრივი ეკონომიკისა და ეკონომიკური პოლიტიკის კომიტეტის სხდომაზე უნდა გამართულიყო, სადაც მთავარი სტუმარი ეროვნული ბანკის პრეზიდენტი კობა გვენეტაძე იყო. ასევე მიწვეული იყვნენ მამუკა ხაზარაძე და ბადრი ჯაფარიძე, თუმცა დარგობრივი ეკონომიკის კომიტეტში მოსმენა ჩაიშალა.
“თიბისი ბანკის" საქმეზე ფინანსური მონიტორინგის სამსახურის მიმართვის საფუძველზე გენერალურმა პროკურატურამ უკანონო შემოსავლის ლეგალიზაციის ბრალდებით გამოძიება დაიწყო. ამასთან, ხაზარაძემ ბანკის სამეთვალყურეო საბჭოს თავმჯდომარის პოსტის დატოვების თაობაზე განაცხადა.
“თიბისიმ“ ეროვნულ ბანკთან სასამართლო დავა შეწყვიტა და 1 მლნ ლარის გადახდას დათანხმდა, თუმცა ხაზარაძე და ჯაფარიძე სასამართლო დავას ინდივიდუალურად აგრძელებენ.
