2020 წელს განათლების, შს, იუსტიციის, საგარეო და თავდაცვის სამინისტროების დაფინანსება იზრდება

2020 წელს, 2019 წელთან შედარებით, განათლების, მეცნიერების, კულტურისა და სპორტის სამინისტროს დაფინანსება 132 მილიონზე მეტი ლარით იზრდება. როგორც 2020 წლის სახელმწიფო ბიუჯეტის პროექტშია აღნიშნული, 2019 წელს ამ სამინისტროს დაფინანსება 1 მილიარდ 503 მილიონი ლარია, ხოლო 2020 წელს 1 მილიარდ 636 მილიონი ლარი იქნება.

მომავალ წელსვე იგეგმება შინაგან საქმეთა სამინისტროს დაფინანსების 29 მილიონი ლარით გაზრდაც. 2020 წელს აღნიშნული უწყებისთვის 770 მილიონი ლარი გამოიყოფა.

მნიშვნელოვნად იზრდება, ასევე, საგარეო საქმეთა და იუსტიციის სამინისტროების დაფინანსებაც. 2020 წლის ბიუჯეტის პროექტის მიხედვით, საგარეო უწყებისთვის, მიმდინარე წელთან შედარებით, გამოყოფილია 22,5 მილიონი ლარით მეტი და დაფინანსება ჯამში შეადგენს 159 მილიონ ლარს. რაც შეეხება იუსტიციის სამინისტროს, ამ უწყებისთვის გამოყოფილი თანხა, წინა წელთან შედარებით გაზრდილია თითქმის 22 მილიონით და შეადგენს 203 მილიონ ლარს.

ასევე, 5 მილიონით იზრდება თავდაცვის სამინისტროს დაფინანსება და 2020 წლისთვის შეადგენს 880 მილიონ ლარს.