თბილისში სამორინეს მოწყობის სანებართვო მოსაკრებელი ერთჯერადად განახევრდა
თბილისში სამორინეს მოწყობის სანებართვო მოსაკრებელი განახევრდა. ამის შესახებ მთავრობის დადგენილება უკვე გამოქვეყნდა.
კერძოდ, მთავრობის 13 ივლისის გადაწყვეტილებით, თბილისში სამორინეს მოწყობის ნებართვის მფლობელი გარკვეული შეღავათით შეძლებს სარგებლობას და 5 მილიონი ლარის ნაცვლად, პირველ წელს 2,5 მლნ ლარს გადაიხდის.
უფრო კონკრეტულად, 2021 წლის 5 ივლისიდან 2022 წლის 1-ელ იანვრამდე გაცემული სამორინეს მოწყობის ნებართვისთვის პირველი წლის სანებართვო მოსაკრებელი 2 500 000 ლარი იქნება. ასევე 2 500 000 ლარით განისაზღვრა - 2021 წლის 1-ლი იანვრიდან 2021 წლის 5 ივლისამდე გაცემული სამორინეს მოწყობის ნებართვისათვის პირველი წლის მომდევნო წლის სანებართვო მოსაკრებელი.
ცნობისთვის, სამორინეს მოწყობის სანებართვო მოსაკრებელი მთელი ქვეყნის მასშტაბით 5 მლნ ლარს შეადგენს, გარდა რამდენიმე გამონაკლისისა. ეს გამონაკლისებია: ბათუმი, დუშეთის მუნიციპალიტეტის ბაზალეთის ტბის მიმდებარე ტერიტორია, ასევე ქობულეთისა და ბორჯომის მუნიციპალიტეტები; გუდაურის განსაკუთრებული რეგულირების ტერიტორია, დაბა ბაკურიანის ტერიტორია, აგრეთვე წყალტუბოსა და სიღნაღის მუნიციპალიტეტების ტერიტორიები; ქალაქ ბათუმში, აგრეთვე ქობულეთისა და ხელვაჩაურის მუნიციპალიტეტებში ახლად აშენებული არანაკლებ ასნომრიანი სასტუმროს ტერიტორია, ასევე ზუგდიდის მუნიციპალიტეტის სოფელ ანაკლიასა და სოფელ განმუხურში ახლად აშენებული არანაკლებ ოთხმოცნომრიანი სასტუმროს ტერიტორია; ახალციხის მუნიციპალიტეტის ტერიტორია; გურჯაანის მუნიციპალიტეტის სოფელ კაჭრეთის ტერიტორია; ლანჩხუთის მუნიციპალიტეტის დაბა გრიგოლეთის ტერიტორია და ქალაქ ფოთის მუნიციპალიტეტის ტერიტორია.
