რას საქმიანობდა ბიზნესმენი, რომელიც დღეს თბილისში მოკლეს

თბილისში, ჭაბუა ამირეჯიბის გზატკეცილზე დღეს, ბიზნესმენი ნუგზარ კახიძე მოკლეს.

როგორც შემთხვევის ადგილზე მეზობლები ამბობენ, ბიზნესმენს თავდამსხმელი „საქართველოს ბანკის“ წარმომადგენლად გაეცნო, კარის გაღების შემდეგ კი 7 ტყვია ესროლა.

ამასთან, არსებული ინფორმაციით, ბიზნესმენს 30 წლამდე მამაკაცმა ესროლა.

ნუგზარ კახიძე ვარკეთილის ბაზრობის მეწილე იყო. კერძოდ, სამეწარმეო რეესტრის მონაცემებით, ის შპს „ვარკეთილი-96“-ის 15%-იან წილს ფლობდა.

ვარკეთილის ბაზრობის გარდა, ნუგზარ კახიძე სხვა კომპანიებშიც ფლობდა წილებს. კერძოდ, საჯარო რეესტრის მონაცემებით, ბიზნესმენი შპს „ლასთინგის“ 90%-იანი წილის მფლობელი და დირექტორი იყო. ასევე იყო შპს“ ბიფორის“ დირექტორი და საწარმოს 90%-იანი წილიც მის საკუთრებაში იყო. გარდა ამისა, ნუგზარ კახიძე რეესტრში შპს „არწივი 08-ს“ დირექტორად და 60%-იანი წილის მფლობელადაც იყო რეგისტრირებული.