დიმიტრი ქუმსიშვილი - InnovFin-ი ინოვაციური პროექტების დაფინანსების შესაძლებლობას იძლევა

InnovFin-ი ინოვაციური პროექტების დაფინანსების შესაძლებლობას იძლევა, - ამის შესახებ პირველმა ვიცე-პრემიერმა, ფინანსთა მინისტრმა, დიმიტრი ქუმსიშვილმა პრეზენტაციის „მცირე და საშუალო ბიზნესის დაფინანსება საქართველოში ევროპის საინვესტიციო ბანკის საკრედიტო ხაზითა და InnovFin-ის გარანტიის პროგრამებით“ დასრულების შემდეგ განაცხადა.

მისივე თქმით, ევროპის საინვესტიციო ბანკი (EIB) საქართველოს ბაზარზე ძალიან აქტიურია. „ბანკი მხარს უჭერს ჩვენი მთავრობის ოთხპუნქტიანი გეგმის განვითარებას. სწორედ ამ მიმართულებით, რასაც ჩვენი ძირითადი ინფრასტრუქტურის განვითარება ჰქვია, ჩვენ ახალ, 250-მილიონ ევროიან ტრანშზე მოვაწერეთ ხელი. თუმცა, ამავე დროს, ევროპის საინვესტიციო ბანკთან გვაქვს მყარი შეთანხმება, რომ ისინი მხარს დაუჭერენ კერძო სექტორის განვითარებასაც. ამ მიმართულებით, ერთ-ერთი ყველაზე საინტერესო პროექტია InnovFin-ის ფონდთან და მის გარანტიებთან წვდომა, - განაცხადა პირველმა ვიცე-პრემიერმა, ფინანსთა მინისტრმა, დიმიტრი ქუმსიშვილმა.

პრეზენტაცია ბათუმში, „პროკრედიტბანკის“ ოფისში გაიმართა და მას საქართველოში ევროკავშირის ელჩი იანოშ ჰერმანი, ევროპის საინვესტიციო ბანკის დირექტორი ჰაინც ოლბერსი, აგრეთვე დიპლომატიური წრეების წარმომადგენლები დაესწრნენ.

პრეზენტაციაზე „პროკრედიტბანკის“ წარმომადგენლებმა ისაუბრეს იმ პროექტების შესახებ, რომლებსაც ევროპის საინვესტიციო ბანკი მათი ბანკის მეშვეობით ახორციელებს, მათ შორის, InnovFin-ის ფარგლებში.

"ინოვფინი" (InnovFin) არის ევროპის საინვესტიციო ბანკის ჯგუფის მიერ შემოთავაზებული ინტეგრირებული და დამატებითი ფინანსური ინსტრუმენტებისა და საკონსულტაციო მომსახურებათა ერთობლიობა, რომელიც კვლევისა და ინოვაციის მთელ ღირებულებათა ჯაჭვს მოიცავს, რათა ხელი შეუწყოს ინვესტიციების განხორციელებას ყველგან, დაწყებული მცირე და დამთავრებული დიდი საწარმოებით. "ინოვფინის" მცირე და საშუალო ზომის საწარმოებისთვის გარანტიის ინსტრუმენტი, საშუალებას მისცემს „პროკრედიტბანკს“ 50 მილიონი ევროს მოცულობის სესხი გასცეს ნოვატორ კომპანიებზე მომდევნო ორი წლის განმავლობაში. ეს არის წვდომა იაფ რესურსზე და შესაბამისად, საქართველოს კომერციულმა ბანკებმა, ისევე როგორც ეს გააკეთა„ პროკრედიტბანკმა“, რისთვის მე მას მადლობას ვუხდი, უნდა გამოიყენონ ეს შესაძლებლობა,“ - განაცხადა დიმიტრი ქუმსიშვილმა.

მისი თქმით, InnovFin-ი იძლევა ინოვაციური პროექტების დაფინანსების შესაძლებლობას. შესაბამისად, ამ პროექტს მოყვება ცოდნა და გამოცდილება. აგრეთვე ტექნიკური დახმარება, თუ როგორ უნდა მოხდეს ინოვაციური პროექტების დაფინანსება.

ამასთან, კიდევ ერთი მიმართულება, რომელზეც პირველმა ვიცე-პრემიერმა ყურადღება გაამახვილა, გარანტიებისა და თანაუზრუნველყოფის საკითხია, რომელსაც აღნიშნული პროექტი ითვალისწინებს.

„სწორედ ეს პროექტი იძლევა იმის შესაძლებლობას, რომ კომერციულ ბანკს შეუმციროს რისკები და შესაბამისად, ევროპული სტრუქტურა InnovFin-ი გამოვიდეს გარანტიის წარმომდგენი იმისათვის, რომ საბოლოო ჯამში კომერციულმა ბანკმა გასცენ სესხები. ჩვენთვის ძალიან მნიშვნელოვანია სტარტაპებისა და ინოვაციური ბიზნესების დაფინანსება და ეს არის ერთ-ერთი ყველაზე კარგი ინსტრუმენტი, რომლითაც დღეს ევროპა მხარს გვიჭერს, რა თქმა უნდა, პარალელურად, სახელმწიფო პროგრამისა „სტარტაპ საქართველო“, - განაცხადა პირველმა ვიცე-პრემიერმა, დიმიტრი ქუმსიშვილმა.