ბრენდირებული ძვირადღირებული ალკოჰოლური სასმელების ფალსიფიკაციის ფაქტი გამოვლინდა

საგამოძიებო სამსახურმა, ბრენდირებული ძვირადღირებული ალკოჰოლური სასმელების ფალსიფიკაციის, ყალბი აქციზური მარკების გამოყენების და გასაღების, ასევე, მეორადი გამოყენების მიზნით აქციზური მარკების გამოყენების და გასაღების ფაქტზე, საქართველოს ერთი მოქალაქე დააკავა.

როგორც საქართველოს ფინანსთა სამინისტროს საგამოძიებო სამსახური იუწყება, გამოძიებამ დაადგინა, რომ ბრალდებული, საკუთარ საცხოვრებელ სახლში კუსტარულად მოწყობილი ტექნიკური საშუალებებით ამზადებდა ფალსიფიცირებულ ბრენდირებულ ალკოჰოლურ სასმელებს - „ჯეკ დენიელს“, „ჩივას რეგალს,“ „აბსოლუტს“, „ფინლანდიას”, „პარლამენტს“, „სტოლიჩნაიას“ და სხვა სასმელებს, რომელთა მარკირებისთვის სისტემატურად იყენებდა ყალბ და მეორად აქციზურ მარკებს, ხოლო შემდგომში ახდენდა მის რეალიზაციას სხვადასხვა სავაჭრო ობიექტებში.

საგამოძიებო სამსახურის მიერ ბრალდებულის სახლიდან ამოღებულია დიდი ოდენობით სხვადასხვა დასახელების ძვირადღირებული ფალსიფიცირებული ალკოჰოლური სასმელები. ასევე, ამოღებულია ფალსიფიცირებული ალკოჰოლური სასმელების წარმოებისათვის საჭირო ინვენტარ-მოწყობილობები და ქიმიური შენაერთები.

საქმეზე გამოძიება საქართველოს სისხლის სამართლის კოდექსის 197-ე მუხლის მე-3 ნაწილით, მე-2001 მუხლის პირველი ნაწილით და მე-2002 მუხლის პირველი ნაწილით მიმდინარეობს, რაც სასჯელის სახით ითვალისწინებს თავისუფლების აღკვეთას ხუთიდან შვიდ წლამდე ვადით.