საქართველოში ბოლო ორი კვირის განმავლობაში ოქრო გაიაფდა. ადგილობრივი ფინანსური ინფორმაციის პლატფორმის „აგორა ფინანსების“ ცნობით, უმაღლესი ხარისხის ოქროს ღირებულება 4.17 ლარით შემცირდა. დღეის მდგომარეობით უმაღლესი 999 სინჯის ოქროს ფასი გრამზე - 96.42 ლარია, მაშინ როცა 11 ნოემბერს მისი ღირებულება - 100.52 იყო.
აგორა ფინანსების ცნობით, ფასი სხვა სინჯის ოქროზეც შემცირდა და ცვლილება 1.5-4 ლარის ფარგლებში მერყეობს.
კერძოდ, 375 სინჯის ოქრო - 36.16 ლარი ღირს, მაშინ როცა 11 ნოემბერს მისი ფასი - 37.73 იყო; 500 სინჯის - 48.22 ღირს, ნოემბრის დასაწყისში კი მისი ფასი - 50.31 იყო; 583 სინჯის გრამი ოქროს ფასი - 58.66 -დან 56.23 ლარამდე შემცირდა. 750 სინჯის ოქროს ფასმა - 75.46 ლარიდან 72.33-მდე დაიკლო; ხოლო 900 სინჯის ოქროს ფასი 1 გრამზე - 86.80 ლარია, მაშინ როცა 11 ნოემბრის მდგომარეობით - 90.56 ლარი ღირდა.
აშშ-ში 9 ნოემბრის საპრეზიდენტო არჩევნებში დონალდ ტრამპის გამარჯვების ფონზე ოქროს ღირებულება მსოფლიოში ერთბაშად 5%-ით გაიზარდა და უნციაზე 1,337 დოლარი შეადგინა. ამის პარალელურად ოქრო საქართველოშიც გაძვირდა. უმაღლესი სინჯის ოქროს ფასმა მაშინ 4 ლარით მოიმატა.
გასულ კვირას მსოფლიო ბაზარზე ოქროს ფასი 9-თვიან მინიმუმზე დაეცა. The Wall Street Journal-ის ინფორმაციით, ძვირფასი ლითონის ფასი 1,5%-ით დაეცა და უნციაზე 1,193.91 დოლარი შეადგინა, რაც ყველაზე დაბალი მაჩვენებელია თებერვლის შემდეგ.
ანალიტიკოსთა განცხადებით, ამის მიზეზი დოლარის გამყარება და ინდოეთიდან იმპორტის აკრძალვის შესახებ სპეკულაციებია.
თაია არდოტელი