რა ქონებას ფლობს მინდია ჯანელიძე - კრიზისების მართვის საბჭოს მდივანმა 2016 წელს ხელფასისა და დანამატის სახით უფრო მეტი მიიღო, ვიდრე პრემიერ-მინისტრმა
სახელმწიფო უსაფრთხოებისა და კრიზისების მართვის საბჭოს მდივანი მინდია ჯანელიძე საქართველოს ერთ-ერთი ყველაზე მაღალანაზღაურებადი საჯარო მოხელეა.
მიმდინარე წლის მარტში შევსებული დეკლარაციის თანახმად, მინდია ჯანელიძემ სახელფასო ანაზღაურების სახით უფრო მეტი თანხა გამოიმუშავა, ვიდრე საქართველოს პრემიერ-მინისტრმა.
დეკლარაციის თანახმად, სახელმწიფო უსაფრთხოებისა და კრიზისების მართვის საბჭოს მდივნის, მინდია ჯანელიძის შემოსავალმა გასული წლის განმავლობაში 94 500 ლარი შეადგინა.
მიმდინარე წლის 3 მარტს შევსებული ქონებრივი დეკლარაციის თანახმად, ჯანელიძე თბილისში ჩარგლის ქუჩაზე მდებარე 115 კვ.მ ფართის ბინას ფლობს, რომელიც 65 000 დოლარად აქვს შეძენილი. მის საკუთრებაშია ასევე ჩარგლის ქუჩაზე მდებარე 20 კვ.მ ფართობის ავტოფარეხი და მოსკოვის გამზირზე მდებარე 72 კვ.მ ფართობის საცხოვრებელი სახლი. რაც შეეხება ფალიაშვილზე განთავსებულ 90 კვ.მ ფართობის კომერციულ ფართს, მისი 100%-იანი წილის მფლობელი მინდია ჯანელიძის მეუღლე ეკატერინე ჯანელიძეა.
დეკლარაციის მიხედვით, ჯანელიძის მეუღლე ასევე ფლობს მსუბუქ ავტომანქანას BMW X4, რომელიც ეკატერინე ჯანელიძეს 41 000 ევროდ აქვს შეძენილი.
ჯანელიძის მეუღლე ფალიაშვილზე მდებარე შპს „თრეველ პორტი საქართველოს“ დამფუძნებელი და დირექტორია. გასულ წელს კომპანიიდან მიღებულმა შემოსავალმა საერთო ჯამში 170 000 ლარი შეადგინა.
ეკატერინე ჯანელიძე ასევე ფიქსირდება შპს „სან ჰაუსი საქართველოს“ პარტნიორად. აღნიშნული კომპანიიდან გასულ წელს მიღებულმა შემოსავალმა 1250,00 ლარი შეადგინა.
დეკლარაციის შევსების მომენტში, სახელმწიფო უსაფრთხოებისა და კრიზისების მართვის საბჭოს მდივნის „თიბისი ბანკის“ სახელფასო ანგარიშზე 6 900 ლარია. ხოლო მისი მეუღლის, ეკატერინე ჯანელიძის „თი ბი სი ბანკის“ სახელფასო ანგარიშზე 8 000 ლარია.
საქართველოს პრემიერ-მინისტრ გიორგი კვირიკაშვილის მიერ მიმდინარე წლის 1 იანვარს შევსებული დეკლარაციის თანახმად, გასულ წელს პრემიერ მინისტრის სახელფასო შემოსავალმა 51 369 ლარი შეადგინა.
იხილეთ აგრეთვე:
რა ქონებას ფლობს პრემიერ-მინისტრი გიორგი კვირიკაშვილი?