ქართულ სატვირთო თვითმფრინავებს ახალი გადასახადი დაუწესდათ
თბილისის საერთაშორისო აეროპორტში სატვირთო საჰაერო ხომალდებს პარკირების გადასახადის გადახდა მოუწევთ. ამის შესახებ, აეროპორტის ოპერატორმა კომპანიამ, „ტავ-ჯორჯიამ“ ავიაკომპანიებს უკვე აცნობა.
საუბარია, აეროპორტში ბაზირებულ ქართულ ავიაკომპანიებზე, რომელთაც აღნიშნული გადასახადის გადახდა იმ შემთხვევაში მოუწევთ, თუ ჩამოფრენიდან 14 დღის განმავლობაში აეროპორტში იქნებიან გაჩერებული.
როგორც კომპანიებში აცხადებენ, გადასახადი განსხვავებულია და თვითმფრინავის ამწეობაზეა დამოკიდებული. კერძოდ, თვითმფრინავის ამწეობის მიხედვით, ჩამოფრენიდან 14 დღის შემდეგ, ყოველ დღეზე, ავიაკომპანიებს 100-365 დოლარის გადახდა მოუწევთ.