3-4 დღეში თბილისში პირველი ელექტროავტობუსი გამოჩნდება - რა მარშრუტზე იმოძრავებს ტრანსპორტი

დედაქალაქში 3-4 დღეში 1-ლი ელექტროავტობუსი გამოჩნდება.

ამის შესახებ „ბიზნესპრესნიუსს“ კომპანია „ფრეგობასის“ დირექტორმა მურმან პატარაიამ განუცხადა.

მისივე თქმით, ელექტროავტობუსი 61-ნომერი ავტობუსის ხაზზე იმოძრავებს და ნებისმიერ მოქალაქეს შეეძლება ნახოს, თუ რა სახის ტრანსპორტზეა საუბარი.

„ეს არის ეკოლოგიურად სუფთა, თანამედროვე ელექტროავტობუსი. მერიასთან მოლაპარაკების საფუძველზე გადავწყვიტეთ, რომ 61-ნომერ ავტობუსსზე რამდენიმე კვირის განმავლობაში იმოძრაოს და მოემსახუროს მოსახლეობას, რათა ნახონ რამდენად კომფორტულია, უსაფრთხოა და ა.შ. ეს არის 35-ადგილიანი ავტობუსი.

რაც შეეხება გადახდის სისტემას, ამაზე მუშაობა მიდის, თუმცა ჩვენი სურვილია, რომ ამ ავტობუსით მგზავრობა უფასო იყოს. აღნიშნული ავტობუსი 2 დღეში იქნება საქართველოში, 3-4 დღეში კი უკვე თბილისში იმოძრავებს,“-აღნიშნა პატარაიამ.

ცნობისთვის, კომპანია „ფრეგობასი“ ჩინურ კორპორაცია ZTE Corporation-სთან და გერმანულ EURABUS-თან ერთად საქართველოში ელექტროავტობუსების წარმოებას გეგმავს. როგორც მურმან პატარაიამ ჩვენთან საუბრისას აღნიშნა, საქართველოში ზუსტად ისეთი ელექტროავტობუსების წარმოება მოხდება, რომელიც რამდენიმე დღეში გამოჩნდება თბილისში.