რა ანაზღაურება ექნება და რა მოთხოვნების დაკმაყოფილება მოუწევს საპენსიო სააგენტოს დირექტორს
ფინანსთა სამინისტრომ საპენსიო სააგენტოს დირექტორის პოსტზე ვაკანსია გამოაცხადა. ცნობისთვის, სააგენტო პასუხისმგებელია დაგროვებითი საპენსიო სქემის განხორციელებაზე, მართვასა და ადმინისტრირებაზე.
აღსანიშნავია, რომ გამოქვეყნებული განცხადების თანახმად, საპენსიო სააგენტოს დირექტორის თანამდებობრივი სარგო - 10 000-დან 15 000 ლარამდე იქნება.
ვაკანტური თანამდებობის დასაკავებლად პირს მოეთხოვება მინიმალური განათლება - ბაკალავრის ხარისხი და ფინანსურ ინსტიტუტში ხელმძღვანელ თანამდებობაზე მუშაობის არანაკლებ 5 წლის გამოცდილება. ამასთან, როგორც ვაკანსიაშია აღნიშნული, სასურველია პირს ჰქონდეს აქტივების მართვის გამოცდილება ან/და საპენსიო სქემების პრინციპების ცოდნა.
ამასთან, გამოცხადებული ვაკანსიის მიხედვით, კანდიდატი სააგენტოს ხელმძღვანელის ვაკანტურ თანამდებობაზე მისაღებად გამარტივებული კონკურსის საფუძველზე შეირჩევა.
საჯარო სამსახურის ვებგვერდზე დაინტერესებულ პირებს განცხადების წარდგენა 29 აგვისტომდე შეეძლებათ; საბოლოო გადაწყვეტილების მიღების ვადა კი 14 სექტემბერია.
შეგახსენებთ, რომ დაგროვებითი საპენსიო რეფორმის ამოქმედება 2019 წლიდან მოხდება.