გიორგი აბაშიშვილის ოჯახის სახელფასო შემოსავალი 1,1 მლნ ლარს აჭარბებს - რა ქონებას ფლობს პრეზიდენტის ადმინისტრაციის უფროსი
პრეზიდენტის ადმინისტრაციის უფროსის თანამდებობაზე გიორგი აბაშიშვილი 2015 წლის 4 დეკემბერს დაინიშნა.
„ბიზნესპრესნიუსი“ დაინტერესდა, როგორია საქართველოს პრეზიდენტის ადმინისტრაციის უფროსის გიორგი აბაშიშვილის ქონებრივი მდგომარეობა.
2018 წლის 27 აგვისტოს შევსებული ქონებრივი დეკლარაციით, დაკავებულ თანამდებობაზე გიორგი აბაშიშვილის ანაზღაურება 2017 წლის განმავლობაში 75 000 ლარი იყო, რაც თვეში 6 250 ლარი გამოდის. ხოლო იმავე წელს ილიას სახელმწიფო უნივერსიტეტში ასოცირებული პროფესორის თანამდებობაზე 36 000 ლარი აიღო, ეს თვეში 3 000 ლარი გამოდის.
ბოლოს შევსებული ქონებრივი დეკლარაციის მიხედვით, პრეზიდენტის ადმინისტრაციის უფროსი გიორგი აბაშიშვილი ფლობს, 55,5 კვადრატული მეტრის, 42,33 კვ.მ და 63,33 კვ.მ-ის ბინებს თბილისში. გარდა ამისა, ქარელში 2211 კვ.მ-ის მიწის ნაკვეთის მფლობელია. ასევე მის მფლობელობაშია 2007 წელს გამოშვებული ავტომანქანა Hyundai Tucson.
რაც შეეხება მის ფინანსურ მდგომარეობას, დეკლარაციის შევსების მომენტში სხვადასხვა ანგარიშზე - 18 428 ლარი, 10 287 ევრო და 25 020 დოლარი ჰქონდა.
მისი მეუღლე თეა მელიქიძე ევროპის რეკონსტრუქციისა და განვითარების ბანკში ბანკირად მუშაობს. 2017 წელს თანამდებობაზე - 1008003,63 ლარი აიღო, რაც თვეში 84 000 ლარი გამოდის.
ამასთან, თეა მელიქიძე ფლობს საგურამოში 4145 კვ.მ მიწის ნაკვეთს, თბილისში 450,8 კვ.მ-ის ფართობის საცხოვრებელს სახლს, ასევე საბურთალოზე 481 კვ.მ მიწის ნაკვეთს და 65,8 კვ.მ ფართობის ბინას ბაკურიანში.
მელიქიძეს დეკლარაციის შევსების მომენტში სხვადასხვა საბანკო ანგარიშზე ჯამში - 2.650 ლარი და 134,22 დოლარი ჰქონდა.
P.S -რედაქციისგან
- პრეზიდენტის ადმინისტრაციის ხელმძღვანელის დეკლარაციის შესახებ ინფორმაციის „ბიზნესპრესნიუსზე“ გამოქვეყნების შემდეგ, ცნობილი გახდა, რომ დეკლარაციის შევსებისას დაშვებული იყო ტექნიკური ხარვეზი, რისი გამოსწორებისთვისაც გიორგი აბაშიშვილმა საჯარო სამსახურის ბიუროს განცხადებით უკვე მიმართა.ლიკა ამირაშვილი