„გაზზე რუსეთის დომინაცია სრულდება“ - ევროპაში ახალი მილსადენი Baltic Pipe გახსნეს
პოლონეთის, ნორვეგიისა და დანიის ლიდერებმა 27 სექტემბერს ახალი მილსადენი - Baltic Pipe გახსნეს და ამით კიდევ ერთი მნიშვნელოვანი ნაბიჯი გადადგეს რუსულ გაზზე დამოკიდებულების შესამცირებლად.
„რუსეთის დომინაციის ერა გაზის სექტორში დასასრულს უახლოვდება. ერა, რომელმაც თავი დაგვამახსოვრა შანტაჟით, მუქარითა და გამოძალვით“, - თქვა პოლონეთის პრემიერ-მინისტრმა, მატეუშ მორავიეცკიმ ინაუგურაციისას.
Baltic Pipe განშტოებაა უკვე არსებული მილსადენის, Europip II-ის, რომელიც ნორვეგიას და გერმანიას აკავშირებს ერთმანეთთან. ახალი გაზსადენი ბუნებრივ აირს გადაზიდავს ასევე ნორვეგიიდან პოლონეთის მიმართულებით, დანიისა და ბალტიის ზღვის გავლით.
პროექტი ცენტრალური ნაწილია პოლონეთის სტრატეგიისა, რომელიც მიზნად ისახავს მიწოდების გზების დივერსიფიცირებას და რუსეთის მიერ უკრაინაში შეჭრით გამოწვეულ ენერგოკრიზისამდე წლებით ადრე დაიწყო.
ამ გეგმაში ნორვეგიიდან გაზის შესყიდვასა და გათხევადებული ბუნებრივი აირის ტერმინალების აშენებას ძირითადი ადგილი უკავია. ქვეყანას რუსული გაზი აპრილიდან აღარ მიეწოდება, მას შემდეგ, რაც საფასურის რუბლში გადახდაზე უარი თქვა.
Baltic Pipe-ის ტრაექტორია:
წყარო: DW
ნორვეგიის ენერგეტიკის მინისტრის, ტერიე ოსლანის თანახმად, „მნიშვნელოვანი ნაბიჯი გადაიდგა რუსული ენერგიისგან ევროპის დამოუკიდებლობის გზაზე. დანიის პრემიერ მინისტრმა, მეტე ფრედერიკსენმა კი დაამატა, რომ ყველაფერი უნდა გაკეთდეს იმისათვის, რათა რუსეთმა ვეღარ შეძლოს ენერგიის ძალაუფლების ინსტრუმენტად გამოყენება.
ნორვეგიამ და პოლონეთმა უკვე გააფორმეს 10-წლიანი კონტრაქტი. ამ დროის განმავლობაში, პოლონეთს ყოველწლიურად 2.4 მილიარდი კუბური მეტრი გაზი მიეწოდება, რაც მისი მოხმარების 15%-ს შეადგენს. 900 კილომეტრიანი მილსადენის სრული წლიური მოცულობა 10 მილიონ კუბურ მეტრს შეადგენს და მისი მშენებლობა 1.6 მილიარდი დოლარი დაჯდა.
პოლონეთს, რომელსაც ახლა გაზის მარაგები 96%-ით აქვს შევსებული, გაზპრომთან, წესით და რიგით, გრძელვადიანი კონტრაქტი წლის ბოლოს უმთავრდება, თუმცა ქვეყანა გაზპრომთან ხელშეკრულების გაწყვეტას ისედაც აპირებდა.
Baltic Pipe ევროკავშირის ენერგოსისტემის უსაფრთხოებისა და მოქნილობის გაზრდისთვის წინგადადგმული ნაბიჯია და მნიშვნელოვანი იქნება როგორც დანიის, ასევე ბალტიის ზღვის ქვეყნების ბაზრების მომარაგებისთვისაც.
