„სტრატეგია არ გვაქვს, თუ გვაქვს გეგმა არ მოჰყვება და გეგმაც თუ არსებობს, ის თაროზეა შემოდებული“ - რამ განაპირობა საკვები პროდუქტების თვითუზრულველყოფის მაჩვენებელის შემცირება

საქართველოში თვითუზრუნველყოფის მაჩვენებელი თითქმის ყველა საკვებ პროდუქტზე შემცირდა. 2022 წელს წინა წელთან შედარებით 74%-დან 62%-მდე შემცირდა სიმინდის თვითუზრუნველყოფის კოეფიციენტი, კარტოფილის 115%-დან 101%-მდე, ბოსტნეულზე 61%-დან 52%-მდე და ა.შ. ზრდა დაფიქსირდა მხოლოდ ყურძენზე - 173%-დან 207%-მდე, ხორბლის თვითუზრუნველყოფის მაჩვენებელი კი იმავე დონეზე დარჩა და 2022 წელსაც მხოლოდ 22%-ს შეადგინა.

„მომავლის ფერმერის“ ხელმძღვანელი, რუსუდან გიგაშვილი „ბიზნესპრესნიუსთან“ ფაქტის განმაპირობებელ რამდენიმე მიზეზს ასახელებს.

„მსოფლიოში რა მოცემულობაც გვქონდა, ეს იყო პოსტპანდემიური პერიოდი და თავისთავად ცხადია, ამან გლობალურად განაპირობა ფასების ზრდა. ამასთან, ჩვენთან გაძვირდა საბრუნავი საშუალებები და კომუნალური გადასახადები. ასევე, პანდემიის შემდეგ, ბიზნესის დიდ ნაწილს თავიდან მოუწია ყველაფრის დაწყება და სასტარტო თანხაც კი სჭირდებოდათ. ეს ყველაფერი ერთად ძალიან დიდი გავლენის მქონედ იქცა. განსაკუთრებით საბრუნავი საშუალებები ისე გაძვირდა, რომ უმრავლესობა ამცირებს წარმოებას და მოცულობებს. ცხოველისა და ფრინველის კვება კატასტროფული ფასი ჯდება. საკვების ადგილზე წარმოება შემცირდა, იმპორტი გაძვირებულია. პესტიციდი, სასუქი, ვეტერინარული პრეპარატი, ყველაფერზე გაზრდილია ღირებულება. ასევე სერვისებზე და მექანიზაციაზეც. ამ ყველაფრის ფონზე, ცხადია შემცირდა მასშტაბები", - აცხადებს გიგაშვილი.

მისივე თქმით, ობიექტურ ფაქტორებთან ერთად დიდი პრობლემაა, სახელმწიფოს მხრიდან სტრატეგიის და გეგმის არარსებობაც.

„განვითარებულ ქვეყნებს ყველაფერი წინასწარ აქვთ გათვლილი. მათ შორის, გათვალისწინებულია ხოლმე კლიმატური ცვლილებების გავლენა და ახალი მავნებლებით გამოწვეული ზარალი. ჩვენთან ამ მხრივ ცნობიერება ძალიან დაბალია. ახალი მავნებლები გამოჩნდნენ და ამ მავნებლებთან ბრძოლის მეთოდოლოგიაში და პრევენციაში ძალიან გვიჭირს. ეს არის ძალიან მნიშვნელოვანი ფაქტორი. მსოფლიოს ყველა აგრარულად წარმატებული ქვეყანა ამ მხრივ მუშაობს პრევენციულად. ჩვენთან მეცნიერება მკვდარია, კერძო სექტორი თავისთვის რაღაცას „ხლაფორთობს“, ადგილზე არაფერი იქმნება და იმპორტით არიან დაკავებული. სახელმწიფო არავისთანაა კომუნიკაციაში და ეს ყველაფერი არ შეიძლება შედეგზე არ ისახებოდეს. ჩვენს შემთხვევაში სტრატეგია არ გვაქვს, თუ გვაქვს, გეგმა არ მოჰყვება და გეგმაც თუ არსებობს, ის თაროზეა შემოდებული", - განაცხადა გიგაშვილმა „ბიზნესპრესნიუსთან".

იხილეთ ასევე: საკვები პროდუქტების თვითუზრულველყოფის მაჩვენებელი შემცირდა - რა გვყოფნის და რა არა