როგორ შეიცვალა შავი, თეთრი და მწვანე კარკასის ფასები საქართველოში

2023 წლის მეორე კვარტალში, წინა კვარტალთან შედარებით საცხოვრებელი უძრავი ქონების ფასების ინდექსი (RPPI) 3 პროცენტით გაიზარდა, ხოლო ინდექსის წლიურმა ზრდამ 13.1 პროცენტი შეადგინა. ამის შესახებ მონაცემებს სტატისტიკის ეროვნული სამსახური აქვეყნებს.

მათივე ცნობით, 2020 წლის საშუალოსთან შედარებით ინდექსი 28.8 პროცენტით არის გაზრდილი. RPPI-ის დაფარვა შემოიფარგლება თბილისით და მოიცავს მხოლოდ ახალი საცხოვრებელი უძრავი ქონების ბაზარს, როგორც მრავალსართულიანი სახლების (ბინების), ისე კერძო სახლების სეგმენტებს.

„საქსტატის“ მონაცემებით, 2023 წლის მეორე კვარტალში, წინა კვარტალთან შედარებით, ფასების ზრდა დაფიქსირდა როგორც საცხოვრებელი ბინების სეგმენტში (3.4 პროცენტი), ისე კერძო სახლების სეგმენტში (1.6 პროცენტი). ასევე 2022 წლის მეორე კვარტალთან შედარებით ფასების ზრდა დაფიქსირდა ორივე სეგმენტში - ბინებზე 10.6 პროცენტით, ხოლო კერძო სახლებზე 16.2 პროცენტით.

საქსტატის მონაცემებითვე, გაზრდილია ფასები კარკასების მიხედვითაც. კერძოდ, სტატისტიკის ეროვნული სამსახურის მონაცემებით, 2023 წლის მე-2 კვარტალში შავი კარკასის ფასი 2 629 ლარი, თეთრი კარკასის - 2 875 ლარი; ხოლო მწვანე კარკასის - 3 350 ლარი იყო.

გასული წლის მეორე კვარტალთან შედარებით, შავი კარკასის ფასი 18,6%-ით, თეთრი კარკასის - 14,8%-ით, ხოლო მწვანე კარკასის ფასი - 14,7%-ით არის გაზრდილი. რაც შეეხება მიმდინარე წლის პირველ კვარტალთან შედარებით ფასები შესაბამისად, 6,3%-ით - 1.,9%-ითა და 2%-ით არის გაზრდილი.