ღაზა - მუდმივი საომარი მოქმედებების ეპიცენტრი, რომელიც მთლიანად საგარეო დახმარებაზეა დამოკიდებული
ღაზას სექტორს - რეგიონს პალესტინაში, რომელიც ხმელთაშუა ზღვის აღმოსავლეთ სანაპიროზე, სამხრეთ-დასავლეთით მდებარეობს, საკუთარი ეკონომიკა ფაქტობრივად, არ გააჩნია. ის მთლიანად საგარეო დახმარებაზეა დამოკიდებული, მათ შორის, ისრაელის, რომელთანაც ახლა სექტორის დე ფაქტო მმართველი „ჰამასი“ ომს აწარმოებს.
ღაზა პალესტინის ტერიტორიების შემადგენელი ნაწილია, რომელსაც 2012 წელს გაეროს გენერალურმა ასამბლეამ “გაეროს არაწევრი დამკვირვებელი სახელმწიფოს" სტატუსი მიანიჭა. ტერიტორია 360 კვადრატულ კილომეტრზე მდებარეობს. მოსახლეობის რაოდენობა კი დაახლოებით 2,5 მილიონია.
1994 წელს, ისრაელმა პალესტინის ეროვნულ ადმინისტრაციას ღაზაზე თვითმმართველობის უფლება გადასცა. მანამდე ღაზა ჯერ ისრაელის (1967 - 94.) უფრო ადრე ეგვიპტის (1978 - 67.) კიდევ უფრო ადრე კი დიდი ბრიტანეთის (1918 -48.) და თურქეთის ( ოდესღაც ღაზა ოსმალეთის იმპერიის ნაწილი იყო) სამხედრო ოკუპაციის ქვეშ იმყოფებოდა.
2007 წლიდან ღაზის სექტორის დე ფაქტო მმართველობას ახორციელებს „ჰამასი“ - პალესტინელთა დაჯგუფება, რომელიც პრეტენზიას აცხადებს, რომ სწორედ ის წარმოადგენს პალესტინის ეროვნულ ადმინისტრაციასა და პალესტინელ ხალხს.
2014 წელს მოლაპარაკებების შემდეგ, „ჰამასმა“ პალესტინის ერთიანი ხელისუფლება ჩამოაყალიბა.
ღაზაში ცხოვრების პირობები სავალალოა: მოსახლეობის 95%-ს არ აქვს წვდომა სუფთა წყალზე, მნიშვნელოვანია ელექტროენერგიის დეფიციტიც - მოსახლეობის ელექტრომომარაგებით უზრუნველყოფას დაახლოებით 600 მეგავატი ელექტროენერგია სჭირდება. მიუხედავად ამისა, ღაზას სექტორი იღებს მხოლოდ 180 მეგავატს - 120-ს პირდაპირ ისრაელიდან 10 ელექტროგადამცემი ხაზის მეშვეობით და 60 - გამომუშავებული ღაზას ელექტროსადგურის მიერ ყატარის მიერ დაფინანსებული საწვავით, რომელსაც ასევე ისრაელი უზრუნველყოფს. შედეგად, მოსახლეობა ელექტროენერგიას რვა საათიანი მონაცვლეობით იღებს: რვა საათი ჩართული და რვა საათი გამორთული. ზაფხულში დენის გათიშვა შესაძლებელია 12 საათამდეც გაგრძელდეს. გარდა ამისა, ისრაელი აფერხებს ენერგოსისტემის სასიცოცხლო რემონტს და განახლებას და აიძულებს ხელისუფლებას, საწვავი მხოლოდ ისრაელიდან იყიდონ.
ღაზა მთლიანად საგარეო დახმარებაზეა დამოკიდებული.
2007 წელს ღაზას სექტორში უმუშევრობამ 40%-ს მიაღწია. Oxfam-ის მონაცემებით, კერძო სექტორი, რომელშიც დასაქმებულია მთელი ღაზის მოსახლეობის 53%, განადგურდა და ბევრი ბიზნესი გაკოტრდა. ამ სექტორში 110 000 მუშაკიდან დაახლოებით 75 000-მა დაკარგა სამსახური. ქალაქის სამრეწველო ოპერაციების 95% შეჩერდა წარმოებისთვის საქონელზე მიუწვდომლობისა და პროდუქციის ექსპორტის შეუძლებლობის გამო.
2005 წლის ივნისში ქალაქში იყო 3 900 ქარხანა, სადაც 35 000 ადამიანი მუშაობდა, 2007 წლის დეკემბერში კი 195 ქარხანა იყო დარჩენილი, 1700 დასაქმებული ადამიანით.
მნიშვნელოვნად არის დაზარალებული სამშენებლო ინდუსტრიაც. ბლოკადამ დააზიანა სოფლის მეურნეობის სექტორი და 40 000 მუშაკი შემოსავლის გარეშე დარჩა.
2000 წლის სექტემბერში 24 000 პალესტინელი ყოველდღიურად ღაზადან ისრაელში სამუშაოდ გადიოდა.
წლების განმავლობაში „ჰამასთან“ დაკავშირებული საქველმოქმედო ორგანიზაციები მსოფლიოს მასშტაბით აგროვებდნენ და დღესაც აგროვებენ შემოწირულობას. ეს საქველმოქმედო ორგანიზაციები ოპერირებენ, მათ შორის, იმ ქვეყნებში, სადაც "ჰამასი" ტერორისტულ ორგანიზაციად არის აღიარებული. მაგალითად, კანადაში, სადაც საგამოძიებო სტრუქტურებმა აღმოაჩნიეს, რომ დაახლოებით 14,6 მილიონი დოლარი კანადიდან ღაზას სექტორში საქველმოქმედო ორგანიზაციების მეშვეობით იყო გაგზავნილი.
"ჰამასს" წლების განმავლობაში გაჰყავდა გვირაბი ეგვიპტის საზღვარზე იარაღისა და სხვა საქონლის კონტრაბანდის მიზნით. 2012 წელს, მინიმუმ 160 ბავშვი ემსხვერპლა მსგავსი გვირაბების გათხრას. ღაზასა და ეგვიპტეს შორის მიწისქვეშა კონტრაბანდის გვირაბებმა, დამატებითი შემოსავალი უზრუნველყო ჰამასის ეკონომიკისთვის. 2013 წლის ბოლოს ეგვიპტის მთავრობამ გვირაბები დახურა. აღნიშნულმა გადაწყვეტილებამ ღაზა უმძიმეს ეკონომიკურ კრიზისში ჩააყენა.
საერთაშორისო სანქციებისგან გამოწვეული გავლენის შემსუბუქების მიზნით, „ჰამასი" აქტიურად იყენებს კრიპტოვალუტას, რადგან ამ უკანასკნელის კონტროლი, ტრადიციულ ვალუტასთან შედარებით, ბევრად რთულია. ქასიმ ბრიგადების ვებ-გვერდებზე განთავსებულია ანიმაციური ვიდეო, რომელშიც დეტალურად არის ახსნილი, თუ როგორ უნდა შექმნან მომხმარებლებმა Bitcoin საფულე და გააკეთონ ანონიმური შემოწირულობა ჰამასისთვის. საიტი ხელმისაწვდომია მრავალ ენაზე, მათ შორის, ინგლისურ, არაბულ, ფრანგულ და რუსულ ენებზე.
მიუხედავად მწვავე ეკონომიკური და სოციალური ფონისა, „ჰამასი“ რჩება ღაზას სექტორის დე ფაქტო მმართველად. მოსახლეობის პროტესტი არსებული რეჟიმის წინააღმდეგ, რომლის დამსახურებაცაა ტერიტორიის ეკონომიკური და პოლიტიკური ბლოკადა, გაგრძელდება, თუმცა, უახლოეს მომავალში მნიშვნელოვანი და ძირეული ცვლილებები მოსალოდნელი არ არის.
