ონლაინ-თაღლითობა „ფეისბუქზე“ - როგორ დავიცვათ თავი ონლაინ-გამოწერების დროს?

ნივთების ონლაინ გამოწერა, საქართველოში სულ უფრო პოპულარული ხდება შესაბამისად, იმატა იმ „ფეისბუკ“ გვერდების რაოდენობამაც, რომელიც ქართველ მომხმარებლებს ნივთების შეძენას, სახლიდან გაუსვლელად, თანხის წინასწარი ჩარიცხვის სანაცვლოდ სთავაზობს. თუმცა, როგორც ჩანს, ბევრი მათგანის უკან თაღლითური სქემა იმალება. იღებენ თანხას, შემდეგ კი მომხმარებლებს შეტყობინებაზეც კი აღარ პასუხობენ.

„ფული წინასწარ ჩამარიცხინეს, მაგრამ ვერც ნივთი მივიღე და არც თანხას მიბრუნებენ. ჩემს შეტყობინებებს საერთოდ აღარ პასუხობენ.. ფეისბუკზე ვწერდი, მერე ვუკომენტარებდი და საერთოდ დამბლოკეს“ - მსგავსი შინაარსის პოსტებს სოციალურ ქსელში ხშირად შევხვდებით.

ონლაინ-თაღლითობის ერთ-ერთი მსხვერპლი რამდენიმე დღის წინ „ბიზნესპრესნიუსსაც“ დაუკავშირდა და დაინტერესდა, თუ როგორ შეუძლია და რა ბერკეტი არსებობს, რომ ან გამოწერილი ნივთი მიიღოს ან გადახდილი თანხა დაიბრუნოს უკან.

გამომდინარე იქიდან, რომ ასეთ შემთხვევაში ძირითადად მცირე მოცულობის თანხაზეა საუბარი, სამართლებრივად მსგავს ფაქტებზე რეაგირება წლების განმავლობაში ნაკლებად ხდებოდა. თუმცა, მას შემდეგ, რაც საქართველოში მომხმარებელთა უფლებების დაცვის შესახებ კანონი ამოქმედდა, ონლაინ გამოწერისას მოტყუებულ მოქალაქეებს უკვე შეუძლიათ საკუთარი უფლებების დასაცავად შესაბამის სამსახურს - კონკურენციის სააგენტოს მიმართონ.

როგორც სააგენტოში „ბიზნესპრესნიუსს“ განუცხადეს, ონლაინ-გამოწერებისას მოტყუებული მოქალაქეების მხრიდან საჩივრები საკმაოდ ხშირია. კერძოდ, სააგენტოში დაფიქსირებული განცხადებების თითქმის 52% სწორედ სოციალურ ქსელში გამოწერისას ონლაინ-თაღლითობებს უკავშირდება.

სააგენტოს ცნობით, 2022 წლის ნოემბრიდან მოყოლებული კონკურენციის სააგენტოში 446 საქმე შევიდა, საიდანაც დაახლოებით 230 ეხებოდა სოციალურ ქსელში (ფეისბუქი, ინსტაგრამი, ტიკ ტოკი) ვაჭრობას.

„მოვაჭრე ვალდებულია მომხმარებელს მიაწოდოს საქონელი დაყოვნების გარეშე, მაგრამ ხელშეკრულების დადებიდან არაუგვიანეს 30 კალენდარული დღისა, თუ ხელშეკრულებით სხვა რამ არ არის გათვალისწინებული. თუკი მოვაჭრე აღნიშნულ ვალდებულებას არ ასრულებს, მომხმარებელმა მოვაჭრეს უნდა განუსაზღვროს გონივრული დამატებითი ვადა ვალდებულების შესასრულებლად. დამატებითი ვადის გასვლის შემდეგ ვალდებულების შეუსრულებლობის შემთხვევაში მომხმარებელს უფლება აქვს, უარი თქვას ხელშეკრულებაზე.

კანონი ასევე ითვალისწინებს იმ შემთხვევებს, როდესაც მომხმარებელს უფლება აქვს არ განუსაზღვროს მოვაჭრეს დამატებითი ვადა და პირდაპირ უარი თქვას ხელშეკრულებაზე. კერძოდ: თუ აშკარაა, რომ მოვაჭრისათვის დამატებითი ვადის განსაზღვრას არავითარი შედეგი არ ექნება, ან მომხმარებელმა ხელშეკრულების შესრულება საქონლის დროულად მიღებას დაუკავშირა.

ამასთან, თუ მომხმარებელს საქონელი იმის გამო არ მიეწოდება, რომ იგი ხელმისაწვდომი არ არის, მოვაჭრე ვალდებულია მომხმარებელს დაუყოვნებლივ აცნობოს ამის შესახებ. თუკი მოვაჭრე ზემოაღნიშნულ ვალდებულებებს არ შეასრულებს, მომხმარებელს უფლება აქვს, კანონის დარღვევის შესახებ მიმართოს კონკურენციის ეროვნულ სააგენტოს, მოვაჭრის მიერ დარღვევის ჩადენიდან არაუგვიანეს 2 წლისა,“- აღნიშნავენ კონკურენციის სააგენტოში.