აშშ-ის მთავრობა $10 მილიარდის ბიტკოინს ფლობს
ამერიკის შეერთებული შტატების მთავრობა ამჟამად 10 მილიარდი დოლარის ღირებულების ბიტკოინს და სხვა კრიპტოვალუტებს ფლობს. ფედერალურ პორტფელში ამ აქტივების თავმოყრა იუსტიციის დეპარტამენტის აქტივობებთანაა დაკავშირებული. მოგეხსენებათ, კიბერდამნაშავეების, თაღლითებისა და ჰაკერების დაკავების შემდეგ, ჩამორთმეული აქტივები ამერიკის მთავრობის კუთვნილებაში გადადის.
ყველაზე დიდი მოცულობით კრიპტოაქტივები დარკ-ვებ ბაზრიდან, Silk Road-დან არის ამოღებული. გარდა ამისა, საკმაოდ მაღალია ჰაკერული დაჯგუფებების წევრების დაკავების შედეგად ამოღებული აქტივების მოცულობაც.
როგორც წესი, საგამოძიებო პროცესის დასრულების შემდეგ, იუსტიციის დეპარტამენტი ჩამორთმეულ აქტივებს აუქციონის წესით ყიდის. ამ მეთოდით ამერიკის მთავრობას უკვე გაყიდული აქვს მილიარდ დოლარზე მეტის ღირებულების კრიპტოაქტივები.
