რა ღირს ხის სახლები და რომელ პროექტებზეა მოთხოვნა - „მოთხოვნა სტაბილურად იზრდება“
„ხის სახლებზე მოთხოვნა ყოველწლიურად სტაბილურად იზრდება,“ - ამის შესახებ „ბიზნესპრესნიუსთან“ კომპანია Kohi-ს დირექტორმა მალხაზ უგრეხელიძემ განაცხადა.
მისი თქმით, Kohi-ს შემთხვევაში განსაკუთრებით არის გაზრდილი მოთხოვნა კომპანიების მხრიდან კომერციული დანიშნულების ობიექტების მშენებლობაზე.
„გვაქვს კერძო შეკვეთებიც, მაგრამ კომერციული დანიშნულების შენობები, მაგალითად საბავშვო ბაღი, კლინიკა, ლაბორატორია, საოფისე სივრცე, სასტუმრო თუ კაფე-რესტორანი, ახლა არის ყველაზე აქტუალური ჩვენი კომპანიისთვის.
მოთხოვნა იზრდება და მეტი ადამიანი ენდობა ხის სახლს, ხვდებიან, რომ ეს არ არის დროებითი საცხოვრებელი და თუ კარგი კომპანია აგიშენებს შეიძლება ხის სახლი იმდენად კაპიტალური იყოს, რომ თავისუფლად გაუწიოს კონკურენცია ტრადიციულ სახლებს,“ - განაცხადა უგრეხელიძემ.
კომპანიის დირექტორი აღნიშნავს, რომ კაპიტალურ ხის სახლებს აშენებენ. 1 კვ.მ-ის ფასი 500-600 დოლარამდე მერყეობს. უგრეხელიძე ამბობს, რომ ყველაზე მოთხოვნადი ამჟამად ბაზარზე 60 კვ.მ ფართობის მქონე ხის სახლებია.
„რომ შევხედოთ ამერიკის და კანადის ბაზარს, ყველაზე ძვირადღირებული კერძო ვილები, რომლის ფასიც რამდენიმე მილიონი დოლარია, უკლებლივ ყველა არის ხის. კიდევ უფრო მეტს იხდიან ხის კონსტრუქციის ვილებში, ვიდრე რკინა-ბეტონში. იგივე შეგვიძლია ვთქვათ ევროპაში. საქართველოში არის აღქმა, რომ თუ ხის სახლს ვაშენებთ, ბევრად უფრო იაფი უნდა დაჯდეს, თუმცა, ნელ-ნელა აქაც ეს კულტურა შემოდის,“ - აღნიშნა უგრეხელიძემ.
ცნობისთვის, კომპანია ქართულ ბაზარზე 2019 წლიდან ოპერირებს. Kohi აშენებს როგორც საცხოვრებელ სახლებს, ასევე, კოტეჯებს, სასტუმროებს, სააგარაკე ობიექტებსა და სხვა დანიშნულების კერძო და კომერციული დანიშნულების კაპიტალურ შენობებს.
