ავტომობილების იმპორტი 14%-ით შემცირდა - სად ვყიდით და ვყიდულობთ
2024 წლის იანვარ-ივლისში საქართველოში მსუბუქი ავტომობილების იმპორტი 14%-ით შემცირდა. წელს საანგარიშო პერიოდში იმპორტირებულია 1.607 მლრდ დოლარის 104 845 ერთეული ავტომობილი, ხოლო გასული წლის იმავე პერიოდში 1.876 მლრდ დოლარის 123 410 ერთეული.
წელს პირველ შვიდ თვეში ქვეყანაში ყველაზე დიდი რაოდენობით ავტომობილის იმპორტი ამერიკიდან განხორციელდა, მსხვილ იმპორტიორთა რეიტინგში აშშ-ს გერმანია და იაპონია მოსდევს. უფრო კონკრეტულად, 2024 წლის იანვარ-ივლისში საქართველოში მანქანების უმსხვილესი იმპორტიორების ათეული ასე გამოიყურება:
- აშშ - 887.1 მლნ დოლარის 74 789 ერთეული;
- გერმანია - 257.6 მლნ დოლარის 4 459 ერთეული;
- იაპონია - 256.9 მლნ დოლარის 16 484 ერთეული;
- კორეა - 27.2 მლნ დოლარის 2 042 ერთეული;
- თურქეთი - 25.4 მლნ დოლარის 586 ერთეული;
- ჩინეთი - 25.4 მლნ დოლარის 1 634 ერთეული;
- კანადა - 16.4 მლნ დოლარის 914 ერთეული;
- გაერთიანებული სამეფო - 16.4 მლნ დოლარის 209 ერთეული;
- ბელგია - 12.1 მლნ დოლარის 345 ერთეული;
- იტალია - 11.8 მლნ დოლარის 102 ერთეული.
რაც შეეხება ექსპორტს, იანვარ-ივლისში, გასული წლის იმავე პერიოდთან შედარებით, 1.3%-ით გაიზარდა. წელს ამ პერიოდში ექსპორტირებულია 1.193 მლრდ დოლარის 57 323 ერთეული მსუბუქი ავტომობილი, ხოლო შარშან პირველ შვიდ თვეში 1.178 მლრდ დოლარის 60 475 ერთეული.
2024 წლის იანვარ-ივლისში საქართველოდან ყველაზე დიდი რაოდენობით ავტომობილების ექსპორტი ყირგიზეთში განხორციელდა. კერძოდ, საანგარიშო პერიოდში უმსხვილესი საექსპორტო ქვეყნების ათეული ასეთია:
- ყირგიზეთი - 538.8 მლნ დოლარის 15 059 ერთეული;
- ყაზახეთი - 384.1 მლნ დოლარის 28 237 ერთეული;
- აზერბაიჯანი - 156.8 ათასი დოლარის 7 875 ერთეული;
- სომხეთი - 65.8 მლნ დოლარის 3 580 ერთეული;
- ტაჯიკეთი - 12.8 მლნ დოლარის 834 ერთეული;
- არაბთა გაერთიანებული საამიროები - 6.6 მლნ დოლარის 238 ერთეული;
- ბელგია - 6.1 მლნ დოლარის 120 ერთეული;
- უკრაინა - 5.6 მლნ დოლარის 762 ერთეული;
- თურქეთი - 3.9 მლნ დოლარის 120 ერთეული;
- უზბეკეთი - 3.4 მლნ დოლარის 90 ერთეული.
