მსოფლიოს 10 საუკეთესო საზაფხულო კურორტი
ჰავაის კუნძულები
ჰავაი აშშ-ის შტატია წყნარ ოკეანეში. ადრე ცნობილი იყო სენდვიჩის კუნძულების სახელით. სულ 32 კუნძულია, მათგან 6 მოზრდილი - ჰავაის დიდი კუნძული, ოაჰუ, მაუი, მოლოკაი, კაუაი და ლანაი მკვეთრად განსხვავდება ერთმანეთისგან, თუმცა ყველგან გასაოცარი კომფორტი და რბილი კლიმატია - ზაფხულში +21, ზამთარში კი +27 გრადუსი. კუნძულებზე თეთრი პლაჟები, პალმები, ლაგუნები, ტროპიკულ ტყეებში შემალული ჩანჩქერები, ნებისმიერი სერფერისთვის საოცნებო ტალღები და რაც მთავარია, საუკეთესო ხარისხის მომსახურებაა. ეფექტს აძლიერებს ეგზოტიკური ყვავილები - განსაკუთრებით ორქიდეები, ულამაზესი ფრინველები და უმდიდრესი წყალქვეშა სამყარო.
კანარის კუნძულები
ესპანეთის ერთ-ერთი ავტონომიური გაერთიანებაა აფრიკის დასავლეთ სანაპიროსთან, მოიცავს 7 კუნძულს: ტენერიფე, ლას-პალმასი, გომერა, იერო, გრან-კანარია, ფუერტევენტურა, ლანსაროტი. უღრანი ტყეები, ეგზოტიკური ფაუნა და ფლორა, უდაბნოები, მთები, ვულკანები და თოვლიც კი, დაუჯერებლად ლამაზი სანაპირო ზოლი - ამ ყველაფერს სწორედ კანარის კუნძულებზე, მსოფლიოს ერთ-ერთ ყველაზე პრესტიჟულ და პოპულარულ კურორტზე ნახავთ. აქ შესანიშნავი ტურისტული ინფრასტრუქტურა და მაღალი დონის მომსახურებაა. ეს ბუნებრივია, რადგან მრავალი წელია, კანარის კუნძულებს ყველაზე ბევრი 5-ვარსკვლავიანი სასტუმრო ემსახურება.
სეიშელის კუნძულები
სეიშელის კუნძულები სახელმწიფოა ინდოეთის ოკეანის დასავლეთ ნაწილში, ეკვატორიდან ცოტა სამხრეთით, აფრიკის სანაპიროდან კი დაშორებულია 1 600 კილომეტრით. სეიშელის კუნძულები ტროპიკული მცენარეების სამშობლოა და სამართლიანად ითვლება ინდოეთის ოკეანის ულამაზეს ადგილად. ეს გრანიტისა და მარჯნის 115 კუნძული სინამდვილეში გამქრალი კონტინენტის - ლემურიის გადარჩენილი ნაშთია. უნიკალური ბუნება და ზღვა მთელი მსოფლიოდან იზიდავს ტურისტებს. ზღაპრული პლაჟებისა და შესანიშნავი წყალქვეშა სამყაროს გარდა, ტურისტები ერთობიან თევზაობით, სერფინგით...
იბიცა
ეს ხმელთაშუა ზღვის კუნძული ესპანეთის შემადგენლობაში შემავალი ბალეარის არქიპელაგის ნაწილია, რომელიც კონტინენტური ესპანეთიდან 90 კმ-ით არის დაშორებული. მისი სახელწოდება დაკავშირებულია ეროტიკისა და გართობის ეგვიპტურ ღვთაებასთან. ის მეტად პოპულარულია თავისუფლებისა და ხმაურიანი დასვენების მოყვარულებში. განსაკუთრებით ცნობილია მრავალრიცხოვანი კლუბებით და წარმოადგენს საკულტო ადგილს ელექტრონული მუსიკის მოყვარულთათვის.
გოა
ქვეყნის მთავარი კურორტია და სრულიად განსხვავდება დანარჩენი ინდოეთისგან. ყოფილი პორტუგალიის კოლონია 1987 წლიდან ცალკე შტატია, ის ყველაზე პატარაა, თუმცა მისი სანაპირო ზოლი 110 კმ-ია. ყველაზე პრესტიჟული სასტუმროები და პანსიონები შტატის სამხრეთ ნაწილშია განლაგებული. აქ დასვენება საკმაოდ ძვირია და მხოლოდ უზრუნველყოფილი ევროპელებისა და მდიდარი ინდოელებისთვის არის ხელმისაწვდომი. სრულიად განსხვავებულია ჩრდილოეთ გოა, რომელიც შედარებით იაფია…
ბალი
ინდონეზიის პოპულარული და ტურისტულად ყველაზე განვითარებული კურორტია. წარმოადგენს მცირე ზონდის კუნძულებში შემავალი მალაის არქიპელაგის კუნძულს. დამსვენებლებს იზიდავს აქაური პირველყოფილი ლანდშაფტი, ტროპიკული ტყეები, საკმაოდ დიდი ვულკანები (კინტამინი, გუნუნგ-ბატური, გუნუნგ-აგუნგი). მიუხედავად იმისა, რომ კუნძული არ არის დიდი, აქაური ლანდშაფტი მეტად მრავალფეროვანია. მხოლოდ აქ ნახავთ პალმების კორომებს, ვულკანური წარმოშობის შესანიშნავ ტბებს და შავი ლავის პლაჟებს. ვულკანები კი მოქმედია, რაც ბალიზე დასვენებას დაუვიწყარს ხდის.
ფჰუკეტი
ფჰუკეტი ტაილანდის ერთ-ერთი ყველაზე რესპექტაბელური, პირველხარისხოვანი კურორტია, რომელიც "წყნარი" დასვენების მოყვარულებზეა გათვლილი. ის ტაილანდის სამხრეთში მდებარეობს და ქვეყნის ყველაზე დიდი კუნძულია ანდამანის ზღვაში. კუნძულზე დასავლელი ტურისტებისთვის სრულიად უცხო და თავისებური ტაილანდური კულტურის უამრავი საინტერესო ღირშესანიშნაობაა. ფჰუკეტი სრულიად აღადგინეს მას შემდეგ, რაც 2004 წელს საშინელი ცუნამი დაატყდა თავს. დღეს მას კვლავ უამრავი დამსვენებელი სტუმრობს.
მალდივის კუნძულები
მალდივის კუნძულები, რომლებიც მარგალიტებივითაა გაბნეული ინდოეთის ოკეანეში, სამხრეთ აზიის ქვეყნის - მალდივის რესპუბლიკის ტერიტორიაა. ეს ნამდვილი ტროპიკული სამოთხეა, მუდმივი ზაფხულისა და უზრუნველი ცხოვრების მხარე. ტემპერატურა არასდროს ეშვება +17 გრადუსზე დაბლა და არ ადის +32 გრადუსზე მაღლა. პალმებით დაფარული კუნძულები გარშემორტყმულია თოვლივით თეთრი პლაჟებით, კრისტალური სუფთა წყლებით, ულამაზესი ლაგუნებით. 20 ატოლისგან შემდგარ ჯაჭვში 1192 მომცრო მარჯნის კუნძულია, რომლებიც პრაქტიკულად ზღვის დონეზეა - ქვეყნის ყველაზე მაღალი წერტილი 2,4 მ სიმაღლეზეა. შესანიშნავი მარჯნის რიფები სავსეა ეგზოტიკური ბინადრებით - წყალქვეშ საოცარი სამყარო იშლება.
პატაია
რეიტინგში ტაილადის მეორე კურორტიც მოხვდა - ეს ქალაქი ტაილანდის სამხრეთ-აღმოსავლეთში, სიამის ყურეს სანაპიროზე მდებარეობს. საკურორტო ქალაქში პლაჟებს მთელი სანაპირო უჭირავს, თუმცა აქ წყალი მუდამ შემღვრეულია. სამაგიეროდ, პატაიაში უამრავი ფეშენებელური სასტუმრო კომპლექსია. კურორტმა უფრო ღამის ცხოვრებით გაითქვა სახელი - მსოფლიოს ნებისმიერი კუთხიდან ჩამოსულ ტურისტებს ღამით პატაიაში ნებისმიერი სახის ეროტიკულ მომსახურებას სთავაზობენ.
ბორა-ბორა
საფრანგეთის პოლინეზიის (რომლის ცენტრიც ტაიტია) კუნძული ბორა-ბორა მდებარეობს გასაოცარი სილამაზის ლაგუნაში, რომელიც შემოსაზღვრულია მარჯნის რიფებითა და პატარა კუნძულებით (ე.წ. მოტუ). ამ კუნძულს სახელი გაუთქვა შესანიშნავმა კურორტებმა, სადაც ქოხები პოლინეზიურ სოფლებს გვაგონებს. ბორა-ბორაზე ადგილობრივთა ჩვეულებების გასაგებად, საუკეთესო საშუალებაა პიკნიკზე წასვლა რომელიმე მოტუზე, სადაც ტაიტელები გასწავლიან კერძის მომზადებას, ძველი წესით ქოქოსის კაკლის გატეხვას. ბორა-ბორაზე გართობებში შედის ზვიგენების გამოკვება, დაივინგი, თევზაობა, ტროპიკული ტყით დაფარულ ფერდობებზე ჯიპით სეირნობა…
წყარო: TOP რეიტინგი