რის გამო იწუნებენ დამსაქმებლები სამსახურის მაძიებლებს?

ახალი თანამშრომლების დაქირავების მცდელობას თან რიგი პრობლემები ახლავს.

ამის შესახებ ეკონომიკის სამინისტროს უნარებზე საწარმოთა მოთხოვნის სტატისტიკური გამოკვლევის ანგარიშშია ნათქვამი.

კერძოდ, ანგარიშის თანახმად, ვაკანსიის შევსებისას ძირითად ხელისშემშლელ ფაქტორებად დასახელდა: აპლიკანტების არაკვალიფიციურობა (36.5%), არასაკმარისი ანაზღაურება (23.6%) და გამოცდილების ნაკლებობა (22.1%). თუმცა, გამოკითხულ საწარმოთა 13.6%-ს აზრით, ასევე პრობლემურია თავად აპლიკანტების რაოდენობის ნაკლებობაც.

როგორც ანგარიშშია აღნიშნული, ძირითადი პრობლემა, რომელიც საწარმოებს ახალი კადრის აყვანისას ექმნებათ - იმ ტექნიკური უნარ-ჩვევების არცოდნაა, რომლებიც დაკავშირებულია დაწესებულებაში გამოყენებულ კონკრეტულ აღჭურვილობასთან ან პროცესებთან. კერძოდ, აღნიშნულ პრობლემაზე გამოკითხულ საწარმოთა და ბიზნესმენთა 30.5% საუბრობს.

შემდეგ მოდის, ჯგუფური მუშაობის უნარების ნაკლებობა, რომელსაც საწარმოთა 16% ასახელებს, 13.2% - ახალი ინფორმაციებისა და უნარების შეძენის ნიჭისა და გამოთვლის, 9.6% კი წაკითხვის, მონაცემებისა და ცხრილების გამოყენების უნარების ნაკლებობას ასახელებს.

„თბილისში ძირითად პრობლემებს წარმოადგენს გამოთვლის, წაკითხვის და მონაცემებისა და ცხრილების გამოყენებისა (85%) და ახალი ინფორმაციების/უნარების შეძენის (83%) ნაკლებობა, ხოლო სხვა დანარჩენ საქართველოში ყველაზე პრობლემურად დასახელდა გადაწყვეტილების მიღებისა (47%) და პრობლემის მოგვარების უნარების (41%) ნაკლებობა,“-აღნიშნულია ანგარიშში.