ბართან მომსახურება იკრძალება - რა ვალდებულებები და შეზღუდვები აქვს კვების ობიექტებს
საკორდინაციო საბჭოს მიერ 9 სექტემბერს მიღებული გადაწყვეტილებით, ეპიდემიოლოგიური ვითარებიდან გამომდინარე, საზოგადოებრივი კვების ობიექტების (რესტორანი, კაფე, სასადილო, საოჯახო სამზარეულო და ა.შ.) საქმიანობა აუცილებელია განხორციელდეს, სამუშაო ადგილებზე ახალი კორონავირუსის (COVID – 19) გავრცელების პრევენციის მიზნით, ჯანდაცვის სამინისტროს მიერ დამტკიცებული რეკომენდაციების სრული დაცვით.
საზოგადოებრივი კვების ობიექტი უნდა აკმაყოფილებდეს შემდეგ მინიმალურ მოთხოვნებს:
- კვების ობიექტზე, შესასვლელში უნდა განხორციელდეს როგორც დასაქმებულთა, ასევე მომხმარებლების თერმოსკრინინგი;
- კვების ობიექტზე მოცდის პროცესის განხორციელებისას, დახურულ სივრცეში, სავალდებულოა პირბადის გამოყენება და სოციალური დისტანციის დაცვა;
- კვების ობიექტის შესასვლელში უნდა განთავსდეს დეზობარიერი, შესაბამისი სავალდებულო ნიშნის მითითებით;
- მომხმარებლებს მომსახურება უნდა მიეწოდოთ ინდივიდუალური გამასპინძლების მეთოდით (კონკრეტული მომხმარებელი მისივე მაგიდიდან აძლევს შეკვეთას);
- ბართან მომსახურების აკრძალვის შესაბამისად სასმელის შეკვეთა მომხმარებელს შეუძლია თავისივე მაგიდიდან;
- მაგიდებს შორის დაცული უნდა იყოს სულ მცირე 2 მეტრიანი მანძილი;
- იმ შემთხვევაში, თუ ვერ ხერხდება 2 მეტრიანი უსაფრთხო დისტანციის დაცვა, შესაძლებელია გამოყენებულ იქნას დროებითი დამცავი ბარიერი;
- ერთი ადამიანის განთავსებისთვის საჭირო ფართობი უნდა შეადგენდეს მინიმუმ 2,25მ2-ს;
- მაგიდებისთვის გამოიყენეთ ერთჯერადი გადასაფარებელი;
- სკამის საზურგეებს შორის მანძილი უნდა იყოს არანაკლებ 1 მეტრი;
- დახურულ სივრცეში ერთ მაგიდასთან დასაშვებია მაქსიმუმ 6 პირის განთავსება;
- ღია სივრცეში ერთ მაგიდასთან დასაშვებია მაქსიმუმ 12 პირის განთავსება;
- განსაზღვრული წესების საილუსტრაციოდ, სავალდებულოა მაგიდების განლაგებისა და დისტანციის მარკირება, შესაბამისი აღნიშვნებით;
- სალაროსთან დაამონაჟეთ დამცავი გამჭვირვალე ბარიერი;
- უზრუნველყავით ობიექტი ანტისეპტიკური საშუალებით, ერთჯერადი ხელსახოცებითა და ხელის ჰიგიენით;
- იხელმძღვანელეთ დასუფთავებისა და დეზინფექციის წესებით.
შეზღუდულია
- ბართან მომსახურება;
- გასართობი დაწესებულებების, ე.წ. ღამის კლუბების საქმიანობა;
- როგორც დახურულ, ასევე ღია სივრცეში 10-ზე მეტი პირის მონაწილეობით საზოგადოებაში დამკვიდრებული სოციალური ღონისძიების (მაგ.: ქორწილი, ნებისმიერი იუბილე, ქელეხი და ა.შ.) ჩატარება
