საჩუქრად მიღებული 6000 ლარი მამისგან - რა ქონებას ფლობს გიგა ბოკერიას ოჯახი
2019 წელს პარლამენტში გიგა ბოკერიას შემოსავალმა 48 143 ლარი შეადგინა. მისი მეუღლის შემოსავალმა კი ჯამურად, სამ სხვადასხვა პოზიციაზე 93 126 ლარი შეადგინა.
2020 წლის 31 დეკემბერს შევსებული ქონებრივი დეკლარაციის თანახმად, ბოკერიას სახელზე უძრავი ქონება არ ფიქსირდება. მის საკუთრებაშია მსუბუქი ავტომობილი - Toyta Camry, რომელიც 2017 წელს აქვს შეძენილი. მასვე დეკლარაციის შევსების მომენტში საბანკო ანგარიშზე - 4 177 ლარი ჰქონდა. ამასთან, მასვე 2019 წელს მამისგან საჩუქრად აქვს მიღებული თანხა - 6 ათასი ლარის ოდენობით.
რაც შეეხება ოჯახის წევრებს, გიგა ბოკერიას მეუღლე - თამარ ჩერგოლეიშვილი ფლობს 75 კვ.მეტრი ფართობის ბინას თბილისში, მსუბუქ ავტომობილს და ირაკლი ფარჯიანისა და ოლეგ ტიმჩენკოს ფერწერულ ტილოებს. აქედან, პირველი საჩუქრად აქვს მიღებული, ხოლო მეორე შეძენილი აქვს 1500 დოლარად.
მასვე დეკლარაციის შევსების მომენტში ნაღდი ფულადი თანხის სახით - 9000 დოლარი ჰქონდა. მასვე საანგარიშო პერიოდში რამდენიმე სესხი ჰქონდა, რომლის შედეგადაც შემოსავალმა ჯამში - 68 322 ლარი, ხოლო გასავალმა - 32000 ლარი და 18780 ევრო შეადგინა.
