მარტში საგარეო ვალის მოცულობა 104,8 მლნ დოლარით შემცირდა

მარტში საქართველოს სახელმწიფო საგარეო ვალი 104, 881 მლნ დოლარით შემცირდა და 7,720 მლრდ დოლარი შეადგინა.

წლიურ ჭრილში კი საგარეო ვალდებულებები 2,032 მლრდ დოლარით არის გაზრდილი. 2020 წლის მარტში სახელმწიფოს საგარეო ვალის მოცულობა 5,688 მლრდ დოლარს შეადგენდა.

2021 წლის მარტის მონაცემებით, სახელმწიფო ვალიდან მთავრობის საგარეო ვალდებულებები შეადგენდა 7,353 მლრდ დოლარს, ეროვნული ბანკის კი - 367 მლნ დოლარს.

ცნობისათვის, ქვეყანას საერთაშორისო ინსტიტუტების, ორმხრივი კრედიტორი სახელმწიფოები და სახელმწიფო ფასიანი ქაღალდების გაყიდვიდან მიღებული ვალდებულებები აქვს.

საქართველოს სახელმწიფოს ყველაზე მსხვილი კრედიტორები არიან: აზიის განვითარების ბანკი (ADB); მსოფლიო ბანკის განვითარების საერთაშორისო ასოციაცია (IDA) და რეკონსტრუქციისა და განვითარების საერთაშორისო ბანკი (IBRD). კერძოდ, IDA-ს მიმართ ვალი 886,577 მლნ დოლარია; IBRD-ის მიმართ სახელმწიფოს საგარეო ვალი 1,144 მლრდ დოლარს, აზიის განვითარების ბანკის (ADB)-ის მიმართ კი - 1,730 მლრდ დოლარს აჭარბებს.