საქართველოს ბიზნეს ასოციაცია ლარის გამყარების გაგრძელების პროცესს მიესალმება

საქართველოს ბიზნეს ასოციაციის განცხადებით, ძალიან სასიხარულო და უაღრესად მნიშვნელოვანია, რომ ლარის გამყარების პროცესი და ეკონომიკის სწრაფი აღდგენა გრძელდება.

თუმცა, ასოციაციის ცნობით, მიუხედავად ეროვნული ვალუტის ბოლოდროინდელი გამყარებისა, არაერთი ინდიკატორით ლარი კვლავ ზედმეტად გაუფასურებული რჩება და მისი შემდგომი გამყარების რესურსი კიდევ არსებობს.

„როგორც ჩვენ ეს არაერთხელ აღგვინიშნავს, ჩვენი ქვეყნის რეალობაში ლარის კურსი არის ეკონომიკის მდგომარეობის მთავარი ბარომეტრი და მისი გამყარება მყისიერად იწვევს ბიზნესისა და მოსახლეობის განწყობებისა და მოლოდინების მნიშვნელოვან გაუმჯობესებას, ზრდის ინტერესს ბიზნეს აქტივობის კუთხით, როგორც ადგილობრივი ასევე უცხოელი ინვესტორების მხრიდან და სხვა.

ამას გარდა, ლარის გამყარების პროცესი კიდევ უფრო გააუმჯობებებს მაკროეკონომიკურ მაჩვენებლებს, მათ შორის მოთოკავს მზარდ ინფლაციას, რაც ბოლო წლებში ნებისმიერი ადამიანისთვის და განსაკუთრებით მოსახლეობის დაუცველი ფენებისათვის საკმაოდ მწავე პრობლემად და გამოწვევად იქცა.

ასევე, ლარის გამყარებამ და გაცვლითი კურსის სტაბილურობამ უნდა გამოიწვიოს ლარისადმი ნდობის თანდათანობითი აღდგენა. ეს კი შექმნის ძლიერ მუხტს ბიზნესსა და ეკონომიკაში და უფრო ეფექტიანს გახდის ფისკალურ, მონეტარულ და სავალუტო პოლიტიკას“, - აღნიშნავენ ასოციაციაში.

მათივე ინფორმაციით, ლარის გამყარება და გაცვლითი კურსის სტაბილურობა ასევე ხელს შეუწყობს ლარიზაციის პროგრამის უფრო ეფექტიანად და ამ პროგრამის ბუნებრივად და წარმატებულად განხორციელების პროცესს.

„ზემოაღნიშულის ფონზე, ოპტიმიზმის საფუძველს ამყარებს ის გაუმჯობესებული განწყობები და პოზიტიური მოლოდინები, რაც საქართველოს ბიზნეს ასოციაციის წევრ კომპანიებში აღინიშნება. ბიზნეს ასოციაცია კი თავის მხრივ, ბიზნესის ძალიან დიდ ნაწილს აერთიანებს და ძალიან კარგად გრძნობს, აღიქვამს და აფასებს ეკონომიკის მაჯისცემას“, - აღნიშნავენ ბიზნესასოციაციაში.