ილონ მასკმა 133.5 მლრდ დოლარი დაკარგა - ვინ გახდა პლანეტის ყველაზე მდიდარი ადამიანი
ბოლო 24 საათში, პლანეტის ყველაზე მდიდარი ადამიანის რეიტინგში ცვლილებაა. ილონ მასკმა, რომელიც დიდი ხნის განმავლობაში რეიტინგის სათავეში იყო, 24 საათში 133.5 მლრდ დოლარი დაკარგა და ახლა, „ფორბსის“ მილიარდერების ჩამონათვალში მე-4 ადგილზეა. მის ანგარიშზე ამ დროისთვის 129.4 მლრდ დოლარია.
პლანეტის ყველაზე მდიდარი ადამიანი კი ბერნარ არნო გახდა, რომლის ქონებაც 166.9 მლრდ-ია. მეორე ადგილზეა ჯეფ ბეზოსი - 158,3 მლრდ დოლარით, მესამე ადგილზე კი, ინდოელი მილიარდერი გაუტამ ადანია - 140,3 მლრდ დოლარით.
ილონ მასკის ქონების ასეთი შემცირების ძირითადი მიზეზი Tesla-ს აქციებზე ფასების ვარდნა გახდა. ოთხშაბათს, ერთდროულად კომპანიის აქციების ფასი 892 დოლარიდან 297 დოლარამდე დაეცა, რაც განპირობებული იყო კომპანიის აქციების სამად გაყოფით (3:1 stock split). სამად გაყოფის შედეგად, ინვესტორები Tesla-ს თითოეული აქციის სანაცვლოდ სამ აქციას მიიღებენ, თუმცა მათი ჯამური ღირებულება და, შესაბამისად, კომპანიის საბაზრო კაპიტალიზაცია არ შეიცვლება. ცნობისათვის, Tesla-ს ხელმძღვანელობამ კომპანიის აქციების გაყოფის გადაწყვეტილება ჯერ კიდევ 2022 წლის მარტში მიიღო.
