რა მიმართულებებზე ჩაინიშნა საქართველოდან სპეცრეისები - რომელი ქვეყნებიდან და როდის შეეძლებათ მოქალაქეებს დაბრუნება

საგარეო საქმეთა მინისტრმა დავით ზალკალიანმა გაასაჯაროვა ფრენების განრიგი - თუ რა მიმართულებებზე დაინიშნა სპეცრეისები.

მისი თქმით, ამ ეტაპზე გასაჯაროვდა უახლოეს ორ კვირის განრიგი, თუმცა, მთავრობა მუშაობს რომ სხვა ქვეყნებიდანაც განხორციელდეს სპეცრეისებით მოქალაქეების ჩამოყვანა.

ორი კვირის განმავლობაში დაგეგმილი სპეცრეისების განრიგი ასე გამოიყურება:

• 23 მარტი – თბილისი-ბერლინი-თბილისი;
• 24 მარტი – ბერძნული ავიაკომპანია “ეგეოსის ავიახაზების” სპეცრეისი, რომლის საშუალებითაც საბერძნეთიდან ჩამოიყვანენ საქართველოს მოქალაქეებს და სამშობლოში დააბრუნებენ საბერძნეთის მოქალაქეებს;
• 26 მარტი – თბილისი-ვენა-თბილისი;
• 31 მარტი – თბილისი-ამსტერდამი-თბილისი;
• 3 აპრილი – თბილისი-ვარშავა-თბილისი;
• 7 აპრილი – თბილისი-ათენი-თბილისი;
• 10 აპრილი – თბილისი-ლარნაკა-თბილისი.

ამასთან, ზალკალიანის თქმით, პრემიერ-მინისტრის დავალებით, სპეცრეისის ბილეთის თანხა არ უნდა აღემატებოდეს 199 ევროს. მისი თქმით, აუცილებელია, რომ ავიაკომპანიამ, რომელიც საქართველოს მოქალაქეების გადმოსაყვანად სპეცრეისებს ასრულებს, ბილეთის ფასის „ეს ჭერი შეინარჩუნოს“.

„პრემიერ-მინისტრის დავალებით, ბილეთის თანხა არ უნდა აღემატებოდეს 199 ევროს. ეს უნდა დაიცვას ავიაკომპანიამ, რომელიც განახორციელებს ავიარეისებს. გვესმის, რომ ბიზნესი მძიმე მდგომარეობაშია, ამიტომ აუცილებელია ეს ჭერი მტკიცედ და მყარად იყოს დაცული ავიაკომპანიის მიერ.

ჩვენი ყველა საელჩო 24 საათიან რეჟიმში აგროვებს ინფორმაციას და ამ ინფორმაციის ანალიზის და გადამუშავების შედეგად, ჩვენ, ჯანდაცვის სამინისტროსთან, ეკონომიკის სამინისტროსთან და ავიაკომპანიასთან ერთად, ეტაპობრივად დავგეგმავთ სხვა მიმართულების სპეცრეისებსაც,“ - განაცხადა ზალკალიანმა.